क्वारेन्टिनस्थल हिरासत, जेल व गोठ साख्वःथें जूगु सांसदतय् द्वपं


२५ जेठ, येँ । राष्ट्रिय सभाया दुजःतयेसँ कोरोना महामारी नियन्त्रणया नितिं क्वारेन्टिन स्थल व्यवस्थित देकेत व परीक्षण अप्वयेकेत सरकारयात इनाप याःगु दु ।

आइतबाः राष्ट्रियसभाया मुँज्याय् सांसदतयेसं क्वारेन्टिन स्थल अव्यवस्थित जूगु व इलय् पीसीआर विधिया परीक्षण मजुया समुदायलय् कोरोना कइगु जोखिम अप्वःगु न्ह्यथंगु दु ।

नेकपाया सांसद खिमलाल भट्टराई नं क्वारेन्टिन व्यवस्थित मजूगु धासें सरकारया ध्यानाकर्षण यानादिल । पुलिसया हिरासत, जेल थें जूगु प्रमुख सचेतक भट्टराई नं न्ह्यथनादिल । क्वारेन्टिन शौचालय, सामाजिक दूरी कायम याना च्वनेगु व्यवस्था, पीसीआर परीक्षण, मास्क, सेनिटाइजरयुक्त जुइमाःगुलिइ वयेकलं बः बियादिल ।
नेकपाया चक्रप्रसाद स्नेहीं सुदूरपश्चिमय् आरडीटी विधिं जाँच याना न्यासः खुसः मनुतय् कोरोना एन्टीबडी पोजेटिभ खनेदूगुलिं डडेलधुरा जिल्लाय् भेन्टिलेटरया व्यवस्था यायेत माग यानादिल । आरडीटी विधिया विश्वसनीयता मदुगुलिं पीसीआर परीक्षण अप्वयेकेत ध्यानाकर्षण तकं यानादिल ।

सांसद रामनारायण बिडारीं कोरोना महामारीया इलय् प्रदेश सरकार अधिकारविहीन जूगु व थथे हे जूसा लोप जुया वनीगु टिप्पणी यानादिल ।

नेकपाया सांसद जीवन बुढां कोरोना महामारी नियन्त्रणय् स्वंगुलिं तहया सरकारदथुइ समन्वय जुइ मफूगु न्ह्यथनादिल । वयेकलं नेपालय् कोरोनाया संक्रमण गुलितक थ्यनेफु धका सरकारया प्रक्षेपण गुलि दु धका न्ह्यसः तःसें तयारीबारे नं न्ह्यनादिल ।

नेपाली काँग्रेसया सांसद रमेशजंग रायमाझीं कोरोना अप्वःसां सरकारं सामान्य रुपं काःगु न्ह्यथनादिल । वयेकलं सम्भावित संक्रमितयात तयातःगु क्वारेन्टिन स्थल सा ख्वः थें जूगु न्ह्यथनादिल ।

कांग्रेस सांसद तारादेवी भट्टं सुदूरपश्चिमय् कोरोना भाइरसया जोखिम अप्वःगु धाःसें क्वारेन्टिनयात व्यवस्थित याना पीसीआर विधिया परीक्षण अप्वयेकेत माग यानादिल ।

राष्ट्रिय जनता पार्टीया मृगेन्द्रकुमार सिंह यादवं कोरोनापाखें जनतायात बचे यायेत पीसीआर परीक्षण अप्वयेकेत व क्वारेन्टिन स्थल व्यवस्थित यायेत इनाप यानादिल ।

समाजवादी पार्टीया प्रमिला कुमारीं कोरोना भाइरस संक्रमणया जोखिमं बचे यायेत क्वारेन्टिन व्यवस्थित यायेत माग तयादिल ।

Share on Google Plus

News: Anonymous

    छ्याता
    फेसबुक छ्याता