कोभिड–१९या उपचार सम्बन्धी ज्ञान व अनुभव थवं थवय् आदन–प्रदान याना समस्या समाधानया नितिं पहल यायेगु आज्जु कथं नेपाल–इजरायल केरोना योजना (एनआइसीआई) गठन जूगु दु । कोरानाया महामारीं ब्वलंगु प्रभाव म्हो यायेत व आवश्यक मेडिकल व्यवस्थापनया नितिं एनआइसीआई गठन यायेत इजरायलया नितिं नेपाःया राजदूत डा. अन्जान शाक्यं न्ह्यथनादीगु दु । वंगु जेठ १३ गते इजरायलय् नेपाली राजदूतावासया संयोजनय् नेपाः व ईजरायलया चिकित्सकपिं दथुइ नेपालय् अप्वयाच्वंगु कोरोना संक्रमण नियन्त्रण व न्युनिकरणया नितिं इजरायलया अनुभव व सफलताया विषय आदान–प्रदानया नितिं भर्चुअल सम्वाद क्वचाःगु खःसा वयाँलिपा थ्व योजना गठन जूगु खः ।
‘नेपालय् लिपांगु इलय् अप्वयाच्वंगु कोरोना संक्रमण व उकिं ब्वलंगु प्रभाव म्हो यायेत व आवश्यक मेडिकल व्यवस्थापनया लागि ग्वाहाली आदान–प्रदान यायेगु आज्जु नापं योजना गठन यानागु खः,’ राजदूत शाक्यं न्ह्यथनादिल । ‘ईजरायल कोरोना नियन्त्रणय् ताःलानाच्वंगु खँय् ईजरायलया अत्याधुनिक प्रविधि, ज्ञान व अनुभवं नेपाः लाभान्वित जुइफइगु अपेक्षा झीसँ कयागु दु ।’ थूगु समितिइ निगुलिं देया विशेषज्ञ डाक्टरत व विज्ञतयेगु थःथःगु समिति देकागु दूतावासं न्ह्यथंगु दु । ‘थूगु समितिदथुइ थवं थवय् स्वापु तया नेपाःया कोरोना उपचार व आइसोलेसन व्यवस्थापनय् ग्वाहाली यायेगु आज्जु कयागु दु,’ शाक्यं तनादिल, ‘निगुलिं पक्षं थवं थवय् ज्ञान व अनुभवं सीकेगु लकस देकेफैगु अपेक्षा यानागु दु । आः मदिक्क इमेलं थवं थवय् सहलह नापं अनुभव आदान–प्रदान यानाच्वनागु दु ।’
शाक्यया कथं थूगु समितिइ नेपाःया स्वास्थ्य सेवा विभाग महानिर्देशक दिपेन्द्र रमण सिंह, नेपाल मेडिकल काउन्सिल अध्यक्ष डा. भगवान कोइराला, स्वास्थ्य सेवा विभाग निर्देशक तारानाथ पोखरेल, नर्सिङ तथा सामाजिक सुरक्षा महाशाखा, स्वास्थ्य सेवा विभाग निर्देशक रोशनी लक्ष्मी तुइतुइ, राष्ट्रिय जनस्वास्थ्य प्रयोगशाला निर्देशक डा. रुना झा, स्वास्थ्य तथा जनसंख्या मन्त्रालयया वरिष्ठ स्वास्थ्य प्रशासक डा. गुणनिधि शर्मा, शुक्रराज ट्रपिकल तथा सरुवा रोग अस्पतालया डाक्टर अनुप बास्तोला, स्वास्थ्य तथा जनसंख्या मन्त्रालयया वरिष्ठ जनस्वास्थ्य प्रशासक, भीम प्रसाद सापकोटा, नेपाल सशस्त्र प्रहरी अस्पतालया डा. शैलेन्द्र श्रेष्ठ, नेपाल आर्मी अस्पतालया डा. अरुण न्यौपाने व डा.सुशील रावल, नेपाल प्रहरी अस्पतालया डा. आशिष दत्त, पाटन अस्पतालया डा. आशिष श्रेष्ठ, त्रिवि शिक्षण अस्पताल महाराजगञ्जया डा. सन्त कुमार दास जुयादि । नेपाल पक्षया कजि धाःसा काठमाडौं विश्वविद्यालयया डा. विराज कर्माचार्य जुयादीगु दु । अथेहे इजरायलया पाखें भौगोलिक व उष्ण प्रदेशीय केन्द्रया प्राध्यापक एली स्वार्य, आन्तरिक संक्रामक ल्वय् व वासःया विशेषज्ञ मिक एल्केन, इपिडियोमोलोजी तथा पब्लिक हेल्थया प्राध्यापक नदेव ड्याभिडोविच , बालचिकित्सक असर मोइजर च्वनादीगु दु । इजरायली पक्षया कजि डा. एडा गन्सच् जुयादीगु दु ।
थ्व ज्याया नितिं नेपालय् दूगु इजरायली राजदूतावासया राजदूतया ब्वति तकं दइ । विश्व स्वास्थ्य संगठनया तथ्याङक कथं इजरायलय् आःतक १८ द्व २ स ६८ म्ह संक्रमित जूगु दुसा सछि व ७९ म्ह न्हूपिं संक्रमित लूगु दु । आःतक इजरायलय् कोरोना संक्रमणं सीपिनि ल्याः २ स व ९९ म्ह दु । राजदूत शाक्यया कथं थ्व नापं नेपाः व इजरायलदथुया दौत्य सम्बन्ध अझ प्रगाढ देकेत इजरायलया प्रविधि, कृषि, स्वास्थ्य थें जाःगु लागाय् नेपाःयात ग्वाहालि याइगु सम्बन्धय् थीथी सम्झौतात क्वचाये धुंकुगु दु । उगु सम्झौतात कोरोनाया महामारी म्हो जुइधुंका कार्यान्वय जुइकथं न्ह्याकेगु तयारी जुयाच्वंगु दु ।
छ्याता
फेसबुक छ्याता