सर्लाहीं सरकारी गाडिइ येँ वःपिंत निजि मोटरसाइकलय् लित छ्वल (भिडियाे)


म्हिगः जक सर्लाहीं सरकारी गाडीइ च्वना येँ वःपिंत हाकनं सर्लाही हे लितछ्वःगु दु । जोखिम अप्वःगु धाःसें सर्लाहीया होरैता नगरपालिका २ या स्वम्ह मनु येँ थ्यंगु खः । सर्लाहीं थः काय् व म्हाय् नापं छम्ह मिसा येँ थ्यंगु खः ।
थूगु घटनाया बुखँ पिहाँ वयेधुंका प्यखेरं थुकिया विरोध जूगु खः । वयाँ लिपा मिसाया भाःत येँ च्वनाच्वंगु खःसा मिसा नापं भातम्हेसित नं सर्लाही हे लित छ्वःगु खः ।

समाचारडेस्कया बिराजकाजी राजोपाध्याय, नेवाः न्यूजया प्रज्वल शाक्य, रेडियो उपत्यकाया विगेन तुलाधर व ननस्टप खबरया बुद्धशरण शाहीं थूगु घटनाया निरन्तर फलोअप याना अपडेट याःगु खः ।
वयाँलिपा सामाजिक संजालय् थूगु घटनायात कयाः व्यापक विरोध शुरु जूगु खः ।

सरकारी गाडीया दुरुपयोग याना सर्लाहीं येँ तक स्वम्ह मनु ल्ह्यःगु खः । म्हिगः प्रदेश २ अन्तर्गत सामाजिक विकास मन्त्रालयया बा २ झ २४१३ नम्बरया गाडीं इपिं येँ वःगु खः ।

येँ महानगरपालिका वडा २२ या वडाध्यक्ष चिनीकाजी महर्जनया पहलय् पास देका निगः मोटरसाइकलं प्यम्हेसित मलङ्गवा हे लित छ्वःगु दु ।

सर्लाहीं येँ वःपिं इपिं शुरुइ येँ २३ वडा ओमबहालय् बालं च्वनाच्वंगु थासय् वःगु खः । तर स्थानीयं विरोध याःसेंलि वडाध्यक्ष मचाराजा महर्जन व नेपाल प्रहरीया पहलय् टेष्ट यायेत अनं छ्वःगु खः । तर इपिं अनं २२ वडा वटु टोलय् गोडामय् च्वं वंगु खः । वटु त्वालय् नं स्थानीय नापं मच्छिन्द्र क्लवया युवातयेसं लकडाउनया इलय् सरकारी गाडीं तराईपाखें मनु हःगु धासें विरोध याःगु खः ।

अन नं स्थानीयया विरोध लिपा प्रहरीं टेकुया राष्ट्रिय जनस्वास्थ्य प्रयोगशालाय् परिक्षणया नितिं यंकुगु खः । बुधबाः आरडिटी परिक्षण नेगेटिभ वःसां पीसीआर विधिं याःगु परिक्षणया रिपोर्ट धाःसा मवःनि धाःगु दु ।

लिपांगु इलय् तराईया छुं जिल्लाय् कोरोनाया संक्रमण अप्वयाच्वंगु दुसा उखँ मनुत चाँ चाँ येँ वयाच्वंगु दु  । थुकियात हे पनेत येँ मनपा उपमेयर हरिप्रभा खड्गी श्रेष्ठं थःहे थानकोट नाकाय् वना निरिक्षण यानादीगु दु । येँ मनपा मेयर विद्यासुन्दर शाक्यं तकं येँ पिनं छगः नं गाडि वयेके मबीगु न्ह्यथनादीगु दु ।

अथे जूसां सरकारी गाडिया दुरुपयोग याना सर्लाहीनिसें येँतक मनु वःगु घटनां अझ नं कार्यान्वयन पक्षय् प्रशासन चुस्त जुइमफूगु संकेत याः ।

(म्हिग मलंगवां वय् धुंका तयार याःगु रिपाेर्ट भिडियाे)



Share on Google Plus

News: Newa News

    छ्याता
    फेसबुक छ्याता