उपत्यका नगरपालिका फोरमं संघीय सरकारं जारी याःगु लकडाउनयात पालना याःसें सक्षम जनशक्तियात श्रम व रोजगारीनाप स्वाका अर्थतन्त्रयात चलायमान देकेगु क्वछ्यूगु दु । स्वनिगःया निगु महानगर व १६ गु नगरपालिकाया मेयर–उपमेयरया मंका संस्था नगरपालिका फोरमया मुँज्यां थुकथं क्वःछ्यूगु खः । कोरोना भाइरसया थूगु थाकुगु इलय् स्वनिगः दुने दूपिं सुयागुं छेँ भुतू मसीकेत व नयेपित्याका च्वने म्वायेकेत सक्षम जनशक्तियात श्रम व रोजगारीनाप स्वाका अर्थतन्त्रयात चलायमान यायेत्यनागु नगरपालिका फोरमया नायः तकं जुयादीम्ह येँ महानगरपालिकाया प्रमुख बिद्यासुन्दर शाक्यं न्ह्यथनादिल । ‘लिपांगु इलय् संघीय सरकारं लकडाउया कडाइ म्हो याःगु दु । थज्यागु इलय् न्हापा थें राहत इनेम्वाःगु नगरपालिका फोरमं निर्णय याःगु दु । अथेजूसां स्वनिगःवासि सुयांगु छेँ भुतू मच्याइगु अवस्था जूसा ग्वाहालि यायेत झी तयार दु ।’
प्रमुख शाक्यं नेपाल सरकारं २०७७ बैशाख २६ गतेनिसें लागु जुइकथं अत्यावश्यक उद्योगत सञ्चालन यायेगु क्वछ्यूगु धासें उगु लागाया संञ्चालनय् सहजीकरण यासें लकडाउनयात पालन यायेगु याकेगु निर्णय नं वैठकं याःगु न्ह्यथनादिल । ‘हलिंन्यंकं जुयाच्वंगु महामारी कोरोनाया थूगु इलय् आगमनयात व्यवस्थित यायेत प्रस्थान विन्दुुइ कडाई यायेगु, थ्यनेमाःगु थासय् स्थानीय तहनाप नं समन्वय याना जक छ्वयेगु व्यवस्था यायेत सरकारनाप इनाप यायेगु निर्णय तकं बैठकं याःगुदु,’ शाक्यं न्ह्यथनादिल । ‘उकिया नितिं स्वनिगः दुहाँ वइगु नाकाय् जक सवारीयात पना मज्यूगु वैगु थाय् हे माला अनं हे वय् वने याके मबीगु व्यवस्था यायेत इनाप यायेगु निर्णय जूगु दु । अत्यावश्यक ज्याया नितिं स्वनिगः दुहाँ वयेमाःगु बाध्यता खःसा अनुमति कया जक दुहाँ वयेगु व्यवस्था यायेत इनाप यायेगु निर्णय जूगु दु ।’ मेयर शाक्यं न्ह्यथनादिल ।
छुँ दिं न्ह्यः जक नगरपालिका फोरमया पदाधिकारीतयेसं कोभिड–१९ सम्बन्धी उच्चस्तरीय समन्वय समितिया संयोजक उपप्रधान नापं रक्षामन्त्री ईश्वर पोखरेलयात नापलाना स्वनिगः दुहाँ वैपिंत कडाई याना स्वनिगःया लकडाउन म्हो यायेमाःगु माग तःगु खः । उगु माग छुँ हदतक सम्वोधन जूगु मेयर शाक्यं न्ह्यथनादिल । स्वनिगः दुहाँ पिहाँ वयेवनेयात कडाई यायेगु व निश्चित लागा दुने सामाजिक दूरी कायम याना आर्थिक गतिविधियात चलायमान यायेगु खःसा संक्रमणं बचे जुइगु नापं भविष्य जुइफइगु आर्थिक संकटयात तकं न्युनिकरण यायेफैगु उपत्यका नगरपालिका फोरमया ठहर दु ।
मध्यपुर ठिमी नगरपालिकाया प्रमुख नापं नगरपालिका फोरमया सचिव मदनसुन्दर श्रेष्ठं स्वनिगःयात सुरक्षित यायेत स्वनिगः दुहाँ वइ थाय् कडाई याना स्वनिगः दुने गतिविधियात चलायमान दयेकेत सहजीकरण यायेगु खँ सकारात्मक जूगु न्ह्यथनादिल । ‘स्वनिगः संघीय राजधानी खः । व हे जुया वैगु दिनय् विदेशं तःधंगु ल्याखय् नेपामिया उद्धार याना हयेमाःगु जुइफु । अज्यागु इलय् स्थानीय तहं थःगु पहलं क्वारेण्टाइन देकेफइमखु । आवश्यक मात्राय् मापदण्ड कथं सञ्चालन यायेफइगु अवस्था तकं मदयेफु । अज्यागु अवस्थायात मध्यनजर यासें स्वनिगलय् क्वारेण्टाइनया व्यवस्थापन संघीय सरकारं यायेगु व उकिया नितिं माःगु ग्वाहालि स्थानीय तहं यायेगु निर्णय बैठक याःगु दु ।’ वयेकलं न्ह्यथनादिल ।
फोरमं थ्व न्ह्यः हे छगु प्रदेशं मेगु प्रदेश, छगु जिल्लां मेगु जिल्ला व छगु स्थानीय तहं मेगु स्थानीय तहतक निर्वाध रुपं आवत–जावत याःस संक्रमणया खतरा अप्वइगु धासें अथे मयायेत इनाप याःगु खः ।
छ्याता
फेसबुक छ्याता