र्यापिड टेष्टिंग किटया हे टेष्टिंग जुयाच्वन, शनिबाः छन्हुं ८९७ म्हेसिया कोरोना परिक्षण


कोरोनाया परिक्षण ल्याः बुलुहुँ अप्वयेकाच्वंगु इलय् र्यापिड टेष्टिंग किटया हे परिक्षण जुयाच्वंगु दु । थ्व किट फुक्क धैथें जिल्लाय् थ्यने धुंकुगु स्वास्थ्य मन्त्रालयया प्रवत्तां न्ह्यथंगु दु । सुदुरपश्चिमया फुक्क जिल्लाय् थ्व किटया परिक्षण जुयाच्वंगु दु । नमुना संकलन तकं अप्वय्कूगु दु ।

शनिबाः छन्हुं हे ८९७ म्हेसिया नमुना परिक्षण जूगु दु । नेपालय् आःतकया दकलय् अप्व कोरोना परिक्षण थ्व हे खः । ४६२६ म्हेसिया आःतक परिक्षण जूगु दु । शनिबाः रेड जोनय् न्याम्हसित तःगु दु । आःतक १८९ म्हेसित रेड जोनय् तयातःगु दु । रेड जोन धाःगु कोरोना संक्रमणया शंकास्पद व्यक्तिपिं खः ।

शनिबाः निसें हे कोरोना परिक्षण येँया वीर अस्पताल नापं टेकु अस्पतालय् नं न्ह्याःगु दु ।
आःतक राष्ट्रिय जनस्वास्थ्य प्रयोगशालाय् ३३९२ म्हेसिया परिक्षण जूगु खःसा थौं हे ६०९ म्हेसिया थूगु हे प्रयोगशालाय् परिक्षण जूगु खः ।

थौंया इलय् ८०८२ म्हेसित क्वारान्ताइनय् तयातःगु दु । प्रदेश सरकार व स्थानिय सरकारं देकातःगु क्वारान्टाइनय् च्वंपिनि ल्याः खः थ्व । उकथं हे ८२म्हसित आइसोलेशनय् तयातःगु दु । स्वनिगलय् १५ म्ह व ६७ म्ह स्वनिगलं पिने आइसोलेशनय् तयातःगु खः ।

११३३ व १११५या कल सेन्टरय् ३०४० म्हेस्यां सेवा काःगु दु । थूगु कल सेन्टरय् थःत कोरोनाया लक्ष्यण खनेदःसा वा थः के कोरोना दु मदु धका परामर्श कायेत छ्यलाच्वंगु दु ।

Share on Google Plus

News: Newa News

    छ्याता
    फेसबुक छ्याता