सरकारं तःधंगु सभा, सम्मेलन व भ्वय् मयायेत आह्वान याःगु दु । आइतबार स्वास्थ्य व जनसंख्यामन्त्री भानुभक्त ढकालं पत्रकार सम्मेलन याना कोरोना भाइरसया जोखिम अप्वःगु धाःसें मनुत मुनिगु ज्याझ्वः मयायेत आह्वान यानादीगु खः ।
मन्त्री ढकालं थाकूगु ई वःसा अन्तराष्ट्रिय हवाई उडान तकं दिकेगु न्ह्यथनादिल । वयेकलं विमानस्थल पुरा बन्द यायेगु विषयलय् धाःसा सहलह जुयाच्वंगु न्ह्यथनादिल ।
मन्त्री ढकालं कोरोना भाइरसया संक्रमण पनेत सरकारं स्वंगु चरणया तयारी याःगु न्ह्यथनादिल ।
न्हापांगु चरणया तयारी कथं आवश्यक सावधानी यायेगु व नेपाः दुहाँ वैगु नाकाय् स्वास्थ्य जाँचया व्यवस्था यायेत्यंगु दु ।
अथेहे निक्वःगु चरणया तयारी कथं संक्रमित नेपामियात तयेत आवश्यक बेडया व्यवस्था यायेत्यंगु दु ।
मन्त्री ढकालं नेपालय् कोरोना संक्रमणं भयावह रुप काःसा दक्व अस्पतालयात उपचारया नितिं छ्यलेगु न्ह्यथनादिल ।
चीनय् कोरोना भाइरसया संकम्रण म्हो जुया वंसां कोरिया, खाडी दे व भारतय् कोरोनाया संकम्रण खनेदुगुलिं नेपालय् नं ग्यानापुगु खः ।
जःलाखःला देया अन्तराष्ट्रिय उडान कटौती न्ह्याःगु दु । त्रिभुवन विमानस्थलया स्वास्थ्य कक्षय् थप जनशक्ति व ज्वरो नापे याइगु मेसिन तयेत्यंगु दु । थप जनशक्ति व ६ गु मेसिन तयाः कोरोना संक्रमण खनेदूगु देसं वइपिं दक्व यात्रुया जाँच यायेगु वयेकलं न्ह्यथनादिल ।
अथेहे मन्त्रालयं तातोपानी व रसुवागढी नाकाय् तकं चिकित्सक खतेयाःगु दु ।
छ्याता
फेसबुक छ्याता