कोरोना (कोभिड–१९) खःला धैगु आशंकाय् प्यम्हसित टेकुस्थित सहिद शुक्रराज ट्रपिकल व सरुवा रोग अस्पतालया आइसोलेसन वार्डय् तयातःगु दु । थ्वमध्ये स्वम्ह चीनं लिहाँवःपिं नेपामि खःसा छम्ह चिनियाँ नागरिक खः ।
कोरोना प्रभावित देसं लिहाँवःपिं इपिं ज्वरो वयेधुंका आइसोलेसनय् तया परीक्षण न्ह्याकूगु खः । इमिगु लाः व हिया नमुना संकलन याना ल्याबय् छ्वयेधुंकुगु दु । थुकिया नतिजा थौं वइगु केन्द्रं न्ह्यथंगु दु ।
ज्वरो वया क्यं वःपिं इपिं विमानस्थलं हःपिं मखुसे थःगु छें लिहाँ वये धुंका ज्वरो वःथें च्वना थःथम्हं अस्पतालय् क्यंवःपिं खः । निर्वाध रुपं कोरोना संक्रमित देसं नेपामि व विदेशीत नेपाः वयाच्वंगु इलय् थथे सिकं वा मसिकं ल्वय् ज्वनावःपिं गुलि दइ ? थ्व न्ह्यसःया लिसः सुनां बी । विश्व स्वास्थ्य संगठनं नेपाःयात अति जोखिम देया धलखय् तयेधुंकुगु दु । थज्यागु इलय् झी थः हे कोरोनाया संक्रमणपाखे बचे जुइत सचेत जुइमाःगु दु । विदेशं वःपिं स्यूसा तुरुन्त अस्पतालय् वना क्यनेत नेवाः न्यूजया इनाप दु ।
छ्याता
फेसबुक छ्याता