इजरायल व साइप्रसया नितिं नेपाःया राजदूत अञ्जान शाक्यं कोरोना भाइरस (कोभिड–१९) या संक्रमणयात नियन्त्रण यायेत इजरायलं छ्यलाच्वंगु सफ्टवेयर एप्लिकेसन ‘सेफ प्लेस’ यात नेपालय् छय्लेत सहलह ब्याकादीगु दु । इजरायलया केएलपी मामन कम्पनीया प्रतिनिधित व नेपाःया स्वास्थ्य तथा जनसंख्या मन्त्रालयया पदाधिकारीत नापं भिडियो कन्फरेन्सपाखें राजदुत शाक्यं सहलह यानादिगु खः ।
इजरायलया लागिं नेपाली दूतावासया संयोजनय् केएलपी मामन कम्पनीया प्रतिनिधिं भिडियो कन्फरेन्सपाखें सफ्टवेयरया ज्याया बारे प्रस्तुति बियादीगु खः । नेपाःया स्वास्थ्य तथा जनसंख्या मन्त्रालयया प्रमुख विशेषज्ञ डा. दिपेन्द्र रमण सिंह नेतृत्वया पुचलं उगु एप्लिकेसन बारे जानकारी कयादिगु खः । सहलहस एचइओसी प्रमुख, वरिष्ठ जनस्वास्थ्य प्रशासक सागर दाहाल, गुणस्तर मापन तथा नियमन महाशाखापाखें वरिष्ठ जनस्वास्थ्य अधिकृतया ब्वति दूगु खः ।
इजरायलं थूगु सफ्टवेयर छ्यलाः लकडाउन हे मतःसे कोरोना संक्रमणयात नियन्त्रणय् कायेत ताःलाःगु कम्पनीया दाबी दु । एप्लिकेसनं कोरोना संक्रमित ब्यक्ति १४ न्हुइ वंगु थाय्या ट्र्याक याना सम्भावित सम्पर्कय् वपिं ब्यक्तिपिंत होम क्वारेन्टाइन वा चिकित्सकनापं स्वापु तयेत छ्याता बी । थ्वः एप्लिकेसन इटाली, क्यानडा, दुबई व मेक्सिको नापंया देसय् छ्यलाच्वंगु कम्पनिं न्ह्यथंगु दु ।
राजदुत शाक्यं थ्व न्ह्यः नं कोरोना भाइरसया बारे परराष्ट्रमन्त्री प्रदीपकुमार ज्ञवाली, श्रम, रोजगार तथा सामाजिक सुरक्षा मन्त्री रामेश्वर यादव नापं नेपाल सरकारया उच्चस्तरीय पदाधिकारीनाप भिडियो कन्फ्रेन्सय् इजरायल व साइप्रसया कोरोना संक्रमणसम्बन्धी तथ्यांक, नेपामिपिनिगु अवस्था, नेपामियात कोरोनाया कारणं खनेदुगु समस्या व नकारात्मक प्रभाव, ब्वलने फूगु समस्या, समस्या समाधानया उपायबारे सहलह यानादीगु खः ।
स्राेत : मैत्रीन्यूज
छ्याता
फेसबुक छ्याता