बिगेन तुलाधर
म्ये च्वमि, लय् चिनामिलिसें म्ये हालामि सलिल सुन्दर तुलाधरया मां रुपशोभा तुलाधर मंगलबाः सनिलया ६ः०० ताः इलय् वासः यायेगु झ्वलय् मन्त । ७६ दँ दुम्ह तुलाधर नर्भिक अस्पतालय् मदुगु खः ।
उपासिका तकं खःम्ह तुलाधरयात मंगलबाः सनिलय् नुगःचुया समस्या खनेदय्वं थापाथलिस्थित नर्भिक अस्पताल यंकूगु खः । वासः याना सामान्य जुइधुंकूम्ह वयेकयात छक्वलं हृदयघाट जुया मदुगु तुलाधरं न्ह्यथनादिल ।
मदुम्हेसिया अन्त्येष्टि थौं येँया लुतिस्थित कर्णदीपय् क्वचाःगु दु ।
मदुम्हेसित काय् सलिलं मि तयादीगु खः ।
सिथं यंके न्ह्यः लुतिइ हे धर्मकीर्ति विहारया गुरुमांपिंपाखें परित्राण पाठ नं जूगु खः ।
मदुम्ह उपासिका तुलाधर व परिवारपाखें निवाः न्ह्यः तिनि धर्मकीर्ति विहारयात बुद्ध मूर्ति देछाःगु खः । मदुम्ह तुलाधरया निम्ह काय्लिसें निम्ह म्ह्याय् दु । वय्कः मदुम्ह म्येहालामि रमेश ताम्राकारया तता नं खः ।
छ्याता
फेसबुक छ्याता