जिवित सम्पदाया सत्यमाेहन जाेशीया किपा दुगु सिक्का वल


न्हापांम्ह म्वाम्ह नागरिकया किपा दुगु सिक्का पिहाँवःम्ह धका वाङमय शताब्दी पुरुष नापं वरिष्ठ संस्कृतिविद् सत्यमोहन जोशीया नां च्वंगु दु । न्हापा जुजु वा राजपरिवारया दुजःया जक थुकथं सिक्का पिहाँवयाच्वंगु खः ।

जाेशीया किपाः दुगु स्वंगु सिक्का मंगलबार छगु ज्याझ्वःया दथुइ अर्थमन्त्री डा युवराज खतिवडा पितब्वयादिल । छुं नं सम्पदा सछि दँ थ्यनेधुंका पुरातात्विक सम्पदा कथं काइगु धासें मन्त्री खतिवडां जोशीयात जिवित सम्पदा कथं संज्ञा बियादिल । जोशीया योगदानयात कदर याना सिक्का पिकायेदुगु सरकारया नितिं गौरवया विषय जूगु अर्थमन्त्री न्ह्यथनादिल ।

शताब्दी पुरुष जोशी सछि दँ थ्यंगु लसताय् नेपाल राष्ट्र बैंक, टक्सार विभागं सिक्का पिकाःगु खः ।

यल महानगरपालिकाया दछियंकं जाेशीया १०० क्वःगु बुदिं न्यायेकेगु आज्जु कथं महानगरपालिकाया इनापय् राष्ट्र बैंकं क्युप्रोनिकेल धातुं दयेकुगु १०० वंगु सिक्का पिकाःगु दु । अथेहे वहया द्वःछि व नीन्याद्व वंगु निगु सिक्का पिकाःगु दु ।

महानगरपालिका प्रमुख चिरिबाबु महर्जनं जोशीया सम्मानं म्वाःगु इलय् हे व्यक्तित्वया योगदान कदर यायेगु संस्कार तयेगु कुतः जूगु न्ह्यथनादिल ।

यल क्षेत्र नं ३ पाखें सांसद् पम्फा भुसालं राष्ट्रियताया भावना अप्वयेकेत संस्कृतिया महत्वपूर्ण भूमिका जुइगु धासें संस्कृति पाखें मुक्कं राष्ट्रयात स्वायेत जोशीं तधंगु योगदान यानादीगु न्ह्यथनादिल ।

उगु इलय् जोशी सछि दँ क्यंगु लसताय दछियंक थीथी ज्याझ्वः ग्वसा ग्वयागु सत्यमोहन जोशी मूल समारोह समिति कार्यसम्पादन समितिया कजि श्रीगोपाल महर्जनं न्ह्यथनादिल । उपप्रमुख गीता सत्यालं जोशीयात सम्मान याये दया सकलसित गौरवया सञ्चार जूगु न्ह्यथनादिल ।


१०० वंगु सिक्काया तौल २५ ग्राम अथेहे व्यास ३७ एम.एम दुसा १० द्व सिक्का पिकाःगु दु । वहया १००० तकाया सिक्काया तौल १० ग्राम दुसा व्यास २९ एम.एम दु । थ्व सिक्का २५ हजार थान पिकाःगु दु अथेहे २५०० तकाया सिक्काया तौल ८ दशमलब ५ ग्राम, व्यास २९ एम.एम व संख्या १० हजार थान दु ।

Share on Google Plus

News: Newa News

    छ्याता
    फेसबुक छ्याता