कीर्तिपुर—द लिजेण्ड अफ कीर्तिलक्ष्मी थाैं निसें फुक्क हलय्


गोरखाया जुजु पृथ्वी नारायण शाहया गोरखा राज्य विस्तार अभियानय् स्वनिगः त्याके मालाच्वनि । तर स्वनिगः दुहाँ वयेगु मू लुखाःत मत्यायेकं थ्व सम्भव मदु। पृथ्वी नारायण शाहया जवःल्हाः धका धयातःम्ह सेनापति कालु पाण्डेया नेतृत्वय् किपुलिइ हमला याइ । तसकं बामलाक ल्वापु जुइ ।

थ्वहे ऐतिहासिक बाखँया लिधंसाय् वासुपासां च्वयातःगु कृति “भैरव सिंह” उपन्यासया लिधंसा कया दयेकातःगु संकिपा खः कीर्तिपुर—द लिजेण्ड अफ कीर्तिलक्ष्मी” ।

थ्व खस नेपाली भाषां दयेकूगु फिल्म खः । आः तक च्यारिटी शोलय् जक लिकुना च्वंगु थ्व फिल्मया आपालं आपा च्यारिटी शो जुइ धुंकुगु दुसाः आः वया थ्व फिल्म असारया १३ गतेनिसे देय् न्यंकं रिलिज जुइत्यंगु दु।

नेपाःया ईतिहासया छगु हाकुगु पाना कथं कयातःगु पृथ्वीनारायणं किपू त्याकूगु घटनाया ज्वलन्त लु कःघाना तःगु थ्व फिल्म नेपाली फिल्मया स्वकुमिया निंतिं न्हूगु सवाः जुइगु दावी निर्देशक प्रदिप खडगीं याना दिल । नेपाःया इतिहासय् नुगः क्वसाःपिनिगु निंतिं नं थ्व संकिपा अध्ययनयय छगु न्हूगु पलाः जुइगु न्ह्यथनादिल ।
कीर्तिलक्ष्मी यात छम्ह काल्पनिक पात्रया रुपय् जक मखसे छम्ह ऐतिहासिक वीराङ्गना धका नाले धुंकुगु अवस्थाय् थ्व छगु स्वयेबहगु फिल्मया रुपय् सकसिनं येकीगु आश फिल्म पुचलं याना च्वंगु दु।

वंगु सोमबार जूगु पत्रकार सम्मेलन फिल्मया नकिं हिसिला महर्जनं थः किपूया म्ह्याय्मचा जुगु व मचाबले निसें विराङ्गना कीर्तिलक्ष्मीयाबारे न्यना वयागुलिं थःयात थ्व रोल म्हिते खना तसकं हे गर्वताःगु खँ कनादिल । पत्रकार सम्मेलनय् थ्व फिल्मया कलाकारपिं मदनदास श्रेष्ठ, लक्ष्मी गिरी, विनोद श्रेष्ठ व एसराज गराच, सिने पत्रकार विजयरत्न तुलाधर“असंबरे”, फिल्मया निर्देशक प्रदिप खडगी अले निर्माता अनन्तकुमार श्रेष्ठपिन्सं नुगः खँ तयादीगु खः ।

स्वनिगलय् करण श्रेष्ठ क्रेजीया रिच ईन्टरटेंटमेंट व स्वनिगलं पिने एफडी कम्पनीं वितरण याइगु थ्व फिल्मया निर्माण धाःसा फोकस पिक्चर्सया निंतिं प्रेम शाही,अनन्तकुमार श्रेष्ठ व वीरेन्द्र ताम्रकार जाना यानादीगु खः । आपालं भुमिकाय् नेपाःया नांजाःपिं कलाकारतसें अभिनय याःगु थ्व फिल्मय् पृथ्वी नारायण शाहया रुपय् एसराज गराच, काजी धनबज्रया रोलय् मदनदास श्रेष्ठ, बीर नरसिंहया रुपय् विनोद श्रेष्ठ, मकर सिंहया रुपय् सुशील राजोपाध्याय, मानबीरया रुपय् सुन्दरलाल श्रेष्ठ, भुयुमायाया रुपय् लक्ष्मी गिरी, चिनी मायाया रुपय् मञ्जु श्रेष्ठ, सुर प्रतापया रुपय् सुनील भट्टराई, कालु पाण्डेया रुपय् उदय श्रेष्ठया नापनापं सुरबीर पण्डित, सञ्जय शर्मा राजोपाध्याय, शिला साय्मि, रश्मी नापित अले कीर्तिलक्ष्मीया युवा भुमिकाय् अन्जला नकःमि लगायत आपालं कलाकार पिन्सं अभिनय याना तःगु दुसाः थ्व फिल्मया कला निर्देशक के.के. मानन्धर, सिनेमाटोग्राफी नबीन जोशी व शंकर महर्जन, द्वन्द उदय श्रेष्ठ , मेकप अमृत मरहठ्ठा व डे«स डिजायन “बसन्ती” थेंज्यागु फिल्मया डिजाइनर उद्धवराज भट्टराईं जुंगें याःगु खः । 
Share on Google Plus

News: Newa News

    छ्याता
    फेसबुक छ्याता