थ्व मि च्याना स्वनिग न्यंंकं वने धुंकुगु दु : डा‍ महेशमान श्रेष्ठ


गुथि विधेयक २०७५ लित काःगु दु । तर विधेयक लित काःसा आन्दोलन मद्यूगु आन्दोलनया न्ह्यलुवापिनिगु धाःपु दु । थ्व हे झ्वलय् थौं माइतिघर मण्डला फिब्व ख्यलय् खबरदारी धर्ना जुइत्यंगु दु । पुर्व तयारी कथं विरोध जुलुस पिकाय्त स्वःगु खःसा आः विरोध मखु खबरदारी जुलुस कथं शान्तिपुर्ण धर्ना च्वनेगु समन्वय समिति संयोजक डा. महेशमान श्रेष्ठं न्ह्यथनादिल ।

गुथि विधेयक विरुद्ध आन्दोलन जुयाच्वन । थीथी समिति निस्वना स्वतस्फुर्त रुपं आन्दोलन व विरोध जुलुसया ग्वसा ग्वयाच्वन । थ्व झ्वलय् नेतृत्व व आन्दोलनया भाला सुनां कायेगु धैगु खँय् विवाद पिहाँ वयाच्वंगु पक्का नं खनेदु । आन्दोलनया जस सुनां कायेगु धका तछाड मछाड जुइफु । थुकियात हे मनन याना संघर्ष समितिपिंत छथाय् हयेत व समन्वय यायेत समन्वय समिति गठन जूगु दु । गुथि विधेयकविरुद्ध थीथी लागाय् नीस्वनातःगु संघर्ष समिति, थीथी खलः पुचः, नेवाः न्ह्यलुवाःपिनिगु बृहत भेलां गुथि विधेयकविरुद्धया आन्दोलनया अवधारणा पारित याःगु खःसा नेवाः न्ह्यलुवाः डा. महेशमान श्रेष्ठं न्ह्यब्वयादीगु अवधारणा सर्वसम्मतिं पारित याःगु खः ।

थ्व विषयलय् प्रज्वल शाक्यं नेवाः न्ह्यलुवा महेशमान श्रेष्ठं लिसे खल्हाबल्हा यानादीगु दु ।

थौं ४ गते आव्हान यानादीगु जुलुस छु जुइ ? 

झीसँ ४ गते गुथि विधेयक विरोध सभा ग्वसा ग्वयेत्यनागु खः । तर थ्व हे झ्वलय् सरकारं विधेयक लित काल । आः विरोध सभाया थासय् खबरदारी सभा जुइ । थ्व सभा जु हे जुइ । सुथः ११ बजे निसें २ बजे तक थ्व जु हे जुइ । अनंलि थ्व विधेयक परिमार्जन गुकथं जुइ धैगु खँय् झी दथुइ सहलह जुइ ।

थ्व झ्वलय् सरकार प्रमुखं गुथि विधेयकया बारे स्वनिगःया सांसद, मेयर व उपमेयर नाप च्वना सहलह ब्याकादिल । गुथि विधेयक लित नं काल । छिं छु धयादी ?

लितकाःगुलिं झीसँ सरकारयात सुभाय बी ।

गुथि विधेयक खारेज जुल । थ्व नापनापं गुथि संस्थान तकं खारेज जुइमाः धैगु सः पिहाँवयाच्वंगु दु । छिं छु धयादी ?

न्हापा कुमारी जात्राया विषयलय् तधंगु ल्वापु जूगु दु । उबलय् पवित्र बज्राचार्ययागु संयोजकत्वय् समिति दयेका गुथि संस्थानयात छु यायेगु धका प्रतिवेदन बियातःगु दु । सरकारं व प्रतिवेदन कथं ज्या याये धका धाःगु । तर आः तक व ज्या मयाः । व याःगु खःसा गुथि संस्थानया यक्व समस्या समाधान जुइगु खः ।

उबलय् उगु प्रतिवेदनं गुथि संस्थानया औचित्व मन्त धका निचोड पिकाःगु खः । गुथि संस्थान खारेज याःसां ज्यू धैगु मनसाय उगु प्रतिवेदनं ब्यूगु खः । थुकिया बारे छिगु धापु छु दु ?

गुथि संस्थान खारेज याना गुथियारतयेत जिम्मा बीगु प्रतिवेदनय् खँ दु ।

गुथि संचालन यायेत सरकारं अनुदान बियावयाच्वंगु दु । गुथिया फुक्क जिम्मा गुथियारतयेत बीगु खःसा सरकारं मस्वइगु खःला ? वयाँ लिपा गुथि सञ्चालन गुथियारतयेसं जक याये फइगु खःला ? छिं छु धयादी? 

गुथि धयागु सार्वजनिक चीज खः । जग्गा जुइमा, तिसा जुइमा, बहाः बही जुइमा, व मिया नयेगु चीज मखु । सरकारं थ्व फुक्क मीगु बस्तु कथं काःगु जुल । थ्व एकदम गलत खः । मेगु धैगु सरकारया भुमिका नं दु । गुथियारतयेसं नं मिया नयेफु नि । सरकारया ज्या धयागु संरक्षण यानाबीगु, रेखदेख यानाबीगु खः नि । अथेजुया गुथियार नं मा, सरकार नं मा । तर गुथियागु सम्पत्ति मिया नयेमज्यू । सरकारं नं मी मज्यू गुथियारतयेसं नं मी मज्यू ।

गुथि विधेयकय् बांलागु पक्ष धका म्हेतयेत बछि बुं बीमा धका तयातःगु दु । मोहीयानी हक बीगु खःसा गुथि संचालन यायेफइला ?

गुथिया जग्गा गुथियारतयेसं नं मी मज्यू, म्हेतयेसं नं मी मज्यू । थ्व मिया नलकिला गुथि सञ्चालन हे जुइ मखुत । झीगु उद्देश्य धयागु गुथि संरक्षण यायेगु खः । झीगु सँस्कृति, सम्पदा संरक्षण यायेगु खः । गुथि सञ्चालन, सँस्कृति न्ह्याकातयेगु मुख्य खँ जुइमा । म्हे तयेत, गुथियारतयेत गथे व्यवस्था यायेगु अनंलि अःपुक समाधान पिहाँवइ । थ्व समस्या ज्यंकेगु नितिं गुथि संस्थानया औचित्यबारेया प्रतिवेदनय् पुवंक न्ह्यथनातःगु दु । व प्रतिवेदन पिकालकि समाधानया लँपु सीकेफइ ।

गुथि विधेयक विरुद्ध आन्दोलनया अवधारणा पितबियादिल । उकिया बारे कनादिसँ ।

थाय्थासं गुथि विधेयकया विरुद्ध आन्दोलन जुयावयाच्वंगु दु । थ्व गुथि विधेयकंयाना झीगु फुक्क सँस्कृतियात असर जुइगु खनेदत । सारा गुथियारयात थुकिं असर लात । गुथियारतयेसं नसें मनसें दुख सिया ज्या यानाच्वंगु दु, पुर्खां निसें सँस्कृतिया नितिं त्याग यानावया ल्यंकातःगु खः व फुक्क सरकारं यंकिन । व बुं नं सरकारं काइन, सम्पदा नं सरकारं लाका काइन । तिसावसः दक्व सरकारं काइन । बुं बछि म्हेयात बीगु, फुक्क काय् धासा म्हेयात हे बीगु प्रावधान हइन । थथे याना गुथिया सम्पत्ति फुक्क सरकारं कया, सरकारया सुयात यः वैत बिया व गुथियात सरकारं दयेकुगु प्राधिकरणं चलय् यायेगु कथं विधेयक हल । थौं गुथियारतयेसं थःगु हे संस्था जूगुलिं माया मतिना याना म्वाकातःगु खः, थ्व ला आःयागु जक खँ मखु । द्वलंद्व दँ निसें छगु पुस्तां मेगु पुस्तायात हस्तान्तरण यानावयाच्वंगु जात्रा पर्व, सम्पदा खः, गुथियारतयेसं थः भापिया म्वाका हयातःगु खः । गुथियारतयेत छखे वांछ्वया सरकारं कायेत्यंगु विरोधय् नेवाःत आन्दोलित जूगु खः । थाय्थासय् थथे आन्दोलन जूगु जुल । थ्व हे झ्वलय् असार ४ गते फिब्वः ख्यः, माइतिघर मण्डलाय् तधंगु सभा यायेत्यनागु जुल । थ्व हे खँ सकसितं कनेगु लागि अले छु कारणं झीसं विरोध यायेमा धका कनेगु लागि आइतबाः सँघर्ष यानाच्वंपिं पासापिंत सःता ४ गतेया बारे नं कानागु जुल । वयेकपिं सकसिनं समर्थन नं यानादिल । थःथःगु ध्वाँय्, गुथियारपिं सकलें मुना वय् धका बचं तकं ब्यूगु दु ।

आन्दोलन तच्वकं जुयाच्वन । तर थुकिया नेतृत्व सुनां यानाच्वन धैगु स्पष्ट मजु । छिं छु धयादी ?

छिं धयादीगु खँ एकदम पाय्छि खः । थ्व आन्दोलन जिमिसं सुरु यानाबियागु खः । जिमिगु नेतृत्व सकस्यां माने यायेमा धयागुला मदु । माइतिघर मण्डलाय् ला झीसँ चिकिचाधंगु मि च्याकाबियागु खः । आः थ्व मि च्याना स्वनिग न्यंंकं वने धुंकुगु दु । अझ स्वनिगलं पिने जिल्ला जिल्लाय् थ्व आन्दोलन वने धुंकुगु दु । थ्व इलय् केन्द्रिय नेतुत्व सुयागु धैगु समस्या दुगु जूगुलिं हे थीथी संघ संस्था, थीथी थाय्या सँघर्ष समितिया मुँज्या तयागु खः । थ्व हे नितिं झीसँ समन्वय समिति पाखें मुँज्या सःतागु खः ।

समन्वय समिति धका सुसु दु ? छु छु पदय् दु ?

समन्वय समितिइ पद छुं हे मदु । माइतिघर मण्डलाय् सँघर्षयाःपिं पाखें ल्याय्म्हतय् राष्ट्रिय पहिचान संयुक्त सँघर्ष समिति धका निस्वनातःगु दु । नेवाः न्ह्यलुवात खुम्ह न्हेय्म्हति दु । थुपिं हे समन्वय समितिइ दु ।

गुथि विधेयकं तप्यंक गुथियारतयेत असर याइ । गुथियारत गुलितक क्वाहाँ वयाच्वंगु दु ?

गुुथियारतयेसं न्हापा छुं हे मस्यू । विधेयक वल धाःगु नं मस्यू । विधेयक धाःगुला संसदय् वनि । सांसदतयेसं झीत धाःवःसा धका झीसँ सी । लिपा बुलुहूँ बुलुहुँ गुथियारतयेसं सियावल । आः मुख्य रुपं गुथियारत दनावयाच्वंगु खः ।

थ्व हे झ्वलय् सत्तापक्ष सांसदतयेसं थीथी खँ धयाच्वंगु दु । थुकिं म्हेत व किसानयात फाइदा जुइ धैगु पिहाँ वयाच्वंगु दु । अझ गुथि सामन्ती खः धयाच्वंगु दु । वयेकपिंसं थ्व छु आधारय् धयाच्वंगु खः ? 

गुथि धयागु झीगु देया सँस्कृति खः । सम्पदा खः । झीगु सँस्कृति, सम्पदायात सामन्तीवाद खः । सँस्कृति नं म्वाल, सम्पदा नं म्वाल । थ्व मिया नःसां ज्यू । सम्पदा दुथाय् व्यापारिक कम्प्लेक्स देकुसां ज्यू । छुं हे म्वाल धायेगु खःसा, झीगु देया सँस्कृति व सम्पदा न्हंका छ्वयेगु खःसाला थ्व धाःगु ठिक हे जू । मखुसा थुकि नित खँ दु । छगु म्हेय् तय्गु खँ दु । म्हेय् तयेत थ्व गुथिं पितिना छ्वय् मज्यू । म्हेय् तयेत अधिकार बीमा । अले गुथियारतयेत नं गुथिं पितिना छ्वय् मज्यू । सरकारं छु यानाबिल, थ्व विधेयकं गुथियारतयेत पितिना छ्वइन । सरकारं धाल, गुथि प्राधिकरण दयेका चलेयाय् । कर्मचारी भर्ना याना चलेयाय् । थथे नं गुुथि चले जुइला ? मेगु खँ छु धायेबलय् गुथि सम्बन्धि कानुन दयेकेत गुथियारतयेके सल्लाह यायेमाःनि । गुथियारतयेके मन्यंसे गुथियारतयेत पितिना छ्वयेगु कानुन दयेकेत्यन, थ्व सरासर नाजायज, एकदम अनुचित, एकदम हे अनुचित ज्या यायेत्यंगु खः ।

थ्व अवस्थाय् माइतिघर मण्डलाय् ४ गते क्वाहाँ वयेत छिं छु धयादी ?

गुथि विधेयक झीगु सँस्कृति, सम्पदा, प्रहार याये कथं दयेकुगु खः । थ्व खारेज अवश्य जुल । तर सँस्कृति व सम्पदा माया मतिना यानादीपिं सकल नेवाःत, सकल गुथियारत अले सकल नेपामी त ११ बजे ब्वति काः झासँ धका जिं इनाप याय् ।

Share on Google Plus

News: Newa News

    छ्याता
    फेसबुक छ्याता