ललितपुर महानगरपालिका, वडा नं. ८ या थीथी महिला समूहया नितिं जूगु १० न्हुया उद्घोषण व वक्तृत्व विकास तालिम क्वचाल । वडा ८ या मय्जुपिन्त ज्याझ्वः बांलाक यायेफयेमा धइगु तातुनां थुगु तालिम जूगु खः । जय मनोहर महाविहार मिसा पुचः, सुबहाःया ग्वसालय्, ललितपुर महानगरपालिका वडा नं. ८ या ग्वाहालिइ जूगु थुगु तालिम २०७५ चैत्र २४ आइतबार न्ह्याःगु खः ।
तालिमय् ग्वसाः खलः जय मनोहर महाविहार मिसा पुचःनाप यलमूल मिसा पुचः, यंगुबहाः मिसा पुचः, सरस्वती मां पुचः, सुबहाः मां पुचः, जागृति महिला समूहया मय्जुपिंनाप त्वाःया भाजुपिन्सं नं ब्वति कयादीगु खः । २५ म्हेसिनं ब्वति काःगु थुगु तालिमय् पत्रकार व ज्याझ्वः न्ह्याकामि सुरजवीर बज्राचार्यं प्रशिक्षण बियादीगु खः ।
जय मनोहर महाविहार मिसा पुचःया अध्यक्ष पञ्चमाया शाक्यया अध्यक्षताय् जूगु समापन ज्याझ्वःया मूपाहाँ लपुमनपा वडा नं. ८ या वडा अध्यक्ष हेम महर्जनं दसिपौ लःल्हासें थजाःगु तालिम व मेमेगु ज्याझ्वः नं यायेत इनाप यानादिल । थजाःगु ज्याझ्वःया नितिं वडापाखें माःकथंंया ग्वाहालिया नितिं थः सदां तत्पर जुइ धयादिसें तालिमया उपलब्धिं थः उत्साहित जुयागु खँ कनादिल ।
समापन समारोहय् विशेष पाहाँकथं वडाया महिला सदस्य लक्ष्मी महर्जन, प्रशिक्षक सुरजवीर बज्राचार्यं नं थःगु नुगःखँ तयादिलसा जय मनोहर महाविहारया दाफा भजन गुरु नेमराज शाक्यं विहारया ऐतिहासिक व सांस्कृतिक महत्वयाबारे कनादिल । समारोहय् विहारया थपाआःजु पुण्यराज शाक्य, वडा सदस्य प्रकाश महर्जन, जय मनोहर महाविहार सुधार समितिया अध्यक्ष सिङ्गराज शाक्य नं पाहाँकथं झायादीगु खः ।
तालिमय् ब्वति कयादीम्ह जय मनोहर महाविहार मिसा पुचःया दुजः अनुषा शाक्यं लसकुस यानादीगु थुगु समारोहय् सुभाय् न्वचु तालिमया हे प्रशिक्षार्थी ग्वसाः खलःया सह–सचिव सुनीता शाक्यं बियादीगु खः । समारोहय् तालिमया अनुभव कनेगु झ्वलय् तालिमं लूगु ज्ञानं थःपिन्त आपालं हःपा जूगु न्ह्यथंसें थजाःगु मेमेगु तालिमया नितिं वडापाखें ग्वाहालि दयाच्वनीगु भलसा प्वंकूगु खः ।
ग्वसाः खलःया सचिव जेविन शाक्यं न्ह्याकादीगु थुगु समारोहय् तालिमय् ब्वति कयादीपिंपाखें नुगःखँ तयेगु झ्वलय् ज्ञानीशोभा शाक्य, बालकुमारी शाक्य, रमिला बज्राचार्य, शान्ता शाक्य, अष्टरत्न शाक्य, सुमन शाक्य, पूनम महर्जन, अञ्जना शाक्य, लक्ष्मी शाक्यं थःथःगु अनुभव कनादीगु खः ।
छ्याता
फेसबुक छ्याता