देय्दसं कौलाथ्व प्रतिपदानिसें पुन्हितक न्यायेकिगु महान् नखः मोहनी थौं निसें न्ह्यात । नलास्वां पिया विधिवत रुपं मोहनी नखः न्ह्याकेगु याइ । शुद्धाशुद्धियाना कयाहःगु फी छ्व ह्वला नलास्वां पीगु याइ । थौं थुकथं पीगु नलास्वांयात दशमीकुन्हु चालं याना क्वकाय्गु याइ । थःजा पिंनि ल्हातं सिनं, नलास्वां प्रसाद कथं ग्रहण याइ । माहनी न्यायेकेत मोहनी सिन्ह तयेहेमा ।
थौं निसेंहे मोहनी छें शक्तिया अधिष्ठात्री देवी दुर्गाया आव्वाहन याना पूजा न्ह्याइ । थौं सुथः नित्य कर्म क्वचाय्का नापसं खुसिं फी हयाः पूजा कोठाय् विधिपूर्पक नलास्वां पी । छ्व दुर्गा देवीया प्रिय वस्तु जुगुलिं थ्व पिया दुर्गायात लल्हाना शक्तिया पुजा याइ ।
कुल परम्परा व थाय् कथं छ्व नापं मेमेगु अन्न नं नलास्वां कथं पीगु यानाच्वंगु खनेदु । नलास्वनेगु न्हि निसें चालं तकया ईयात नवरात्र नं धाइ । थुगु इलय् दुर्गादेवीया विशेष आराधना जुइ । थौं नलास्वनेगु साइत सुथ ७ बजे जुया १५ मिनेटय् दुगु नेपाल पञ्चाङ्ग निर्णायक समितिं न्ह्यथंगु दु ।
नवरात्र कुन्हु नवदुर्गाया पूजा जुइ । न्हापांगु दिं शैलपुत्री, निन्हुया दिं ब्रह्मचारिणी, स्वन्हुया दिं चन्द्रघण्टा, प्यन्हु कुन्हु कुष्माण्डा, न्यान्हु स्कन्दमाता, खुन्हु कुन्हु कात्यायनी, न्ह्यय्न्हु कुन्हु कालरात्री, च्यान्हु महागौरी व गुन्हुया दिं सिद्धिदात्रीया पूजा आराधना याइ ।
नवरात्रन्यंक दुर्गा सप्तशती चण्डी, श्रीमद्देवीभागवत व मेपिं देवी स्तोत्र नापं स्तुति पाठ याइ । थुगु इलय् नक्साल भगवती, शोभा भगवती, नाला भगवती, पलाञ्चोक भगवतीनापं देन्यंकया शक्तिपीठय् पूजा आराधना नापं दर्शन याइपिं भक्तजनत म्वः म्वः दइ । नवरात्र धका म्हस्यूगु विजया दशमीतकया १० न्हू थुगु दँ तिथिया घटवढ मदुगुलिं गुंगु चा हे दु ।
थौं निसें यक्व धैथें शैक्षिक संस्थां मोहनीया सार्वजनिक बिदा ब्यूगु दु । नलास्वांया इलय् धासा सरकारी बिदा कटौती जुगु दु । थुगु दँ मोहनीया बिदा असोज ३० निसें फूलपातीतक कात्तिक ३ एकादशीतक बियातःगु दु ।
0 Comments:
Post a Comment