थौं श्रीकुमारी, श्रीगणेश व श्रीभैरवया थःने याः न्याय्किगु दिं । बसन्तपुर कुमारी छें न्ह्यःने दिकातःगु स्वंगुलिं खः साला थःने याः न्यायेकेत्यंगु दु । न्हिनसिया ४ बजे खः सालिगु इन्द्रजात्रा व्यवस्थापन समितिया नायः गौतम शाक्यं न्ह्यथनादिल ।
अथेहे म्हिगः राष्ट्रपति विद्यादेवी भण्डारीं वसन्तपुर दरबार लागाय् खःयात्राया दर्शन याःगु खः । राष्ट्रपतिं वसन्तपुर गद्दी बैठकं खः यात्रा अवलोकन याःगु खः । थीथी देवगण, पुलुकिसी, सवःभकु, महाकाली, लाखे, झ्यालिञ्चा, ख्याक आदिं खः नापं क्वने परिक्रमा याःगु खः ।
ञलाथ्व चतुर्दशीया मू खः यात्रा अवलोकनया नितिं कार्यवाहक प्रधानमन्त्री, प्रधानन्यायाधीश, राष्ट्रियसभाया अध्यक्ष, मन्त्रिगण, नेपालया विदेशी कूटनीतिक नियोगया प्रतिनिधि, स्थानीय तहया जनप्रतिनिधिनापंया ब्वति दुगु खः । विशिष्ट व्यक्तित्वपिंसं गद्दी बैठकं जात्राया अवलोकन याःगु खः ।
परम्परागत येंयाः यें, यल, ख्वप, धौख्यः, दोलखानापंया थासय् नं न्याय्कु । जात्राया झ्वलय् सवःभकु, महाकाली, लाखे, दीप्याखँ, दशअवतार, पुलुकिसी नापं पिहाँवइ ।
थौं हे समय्बजि इनेगु दिं कथं कयातःगु दु । थ्व कारणं समयबजि पुन्हि कथं नं थ्वयात कयातःगु दु । त्वाः त्वालय् समय्बजि ब्वया इनेगु याइसा, हाथुद्यः थापना यानातःथाय् हाथा हाय्केगु याइ ।
0 Comments:
Post a Comment