कार्तिक नाच निसें साल्सा डान्स छगु हे दबुलिइ


नेपालय् न्हापांगु नृत्य विधाय् याकः ज्याझ्वः वंगु आइतबार असार ३ गते येँया जमलया सांस्कृतिक संस्थान राष्ट्रिय नाचघरय् ‘स्वजन रघुवंशी एकल साँझ’ तःजिक हे क्वचाल । लाईभ वाद्यवादन व गायननापं थीथी ७ गु फर्मया प्याखँत स्वजन रघुवंशीं न्ह्यब्वगु खः ।

थःगु याकः सनिलया शुरुवात नमस्कार प्याखनं याःगुु खःसा लोक नृत्य नापं कथक व भरतनाट्यमया नमस्कार व कात्ति प्याखँया द्यः ल्हाना वन्दना याःगु खः । वयाँलिपा कार्तिकय् मंगलबजारया कार्तिक डबलीइ जक क्यनिगु कात्ति प्याखँ न्हापांगु खुसि मंचमा न्ह्यब्वल । ४०० वर्ष स्वयाँ पुलांगु थुगु प्याखँया उषाहरण लीलाया कुमार नृत्य न्ह्यब्वगु खः ।


ज्याझ्वलय् चर्या प्याखँया पंचकपाल प्याखँ न्हापांगु खुसि न्ह्यब्वःगु खः । गुह्य रुपं न्ह्यब्वइगु चर्या अन्तर्गत वौद्ध परम्पराया महायान सम्प्रदाय दुने थुगु प्याखँ लाः । मादलया तालय् झ्याउरे प्याखँ, भरतनाट्यम नृत्य नापं पाश्चात्य प्याखँ साल्सा डान्सनं न्ह्यब्वःगु खः । साल्साय् स्वजनयात कृपा बज्राचार्यं साथ ब्यूगु खः । कृष्णं कालिया नागया दमन याःगु बाखँ नापंया कत्थक १८ मिनेट क्यंगु खः । लिपांगु इलय् हलिं न्यंकया माँयात श्रद्धा व आदर आदर यासें माँ प्याखँ न्ह्यब्वःगु खः । माँ प्याखँ क्वचाय्का स्वजनया माँ कृष्णशोभा रघुवंशीया मंचय् आगमनलिपा माहौल भावुक जुगु खः ।


पाहाँ कथं झायादिम्ह शताब्दि पुरुष संस्कृतिविद् डा. सत्यमोहन जोशीं कात्ति प्याखँयात गिनिज बुकय् तय्माःगु न्ह्यथनादिल । ज्याझ्वलय् नृत्य निर्देशक हनी श्रेष्ठं छम्ह कलाकारं म्ये हाला वा बाजं थाना याकः सनिल यायेगु स्वयाँ याकः प्याखँ क्यनेगु तसकं थाकुगु न्ह्यथनादिल । नृत्य निर्देशक श्रेष्ठं रघुवंशीया प्रशंसा यानादिल । नृत्य निर्देशक संघ नेपालया केन्द्रीय न्वकु संजय शर्मा राजोपाध्यायं कलाकार वा कला क्षेत्र देया तिसा जक मखुसे न्यागुगु अंग कथं परिभाषित मजुतले कला लागाया विकास मजुइगु न्ह्यथनादिल । देन्यंकया नृत्य निर्देशकपिं संगठित जुया नृत्य निर्देशक संघ नेपाल गठन जुगु श्रावण २६ यात राष्ट्रिय नृत्य दिवसकगं घोषणा याय्त संघया केन्द्रीय नायः भुवनदास श्रेष्ठं माग यानादिल ।


भारतया इलाहावाद विश्वविद्यालयपाखें कत्थकय् गोल्ड मेडल त्याःम्ह स्वजनया याकः प्याखँ नृत्य निर्देशक संघ नेपाल, यल शाखा व सांस्कृतिक संस्थानया मंका ग्वसालय् जुगु खः ।

किपा : आकाश राजोपाध्याय

Share on Google Plus

News: Newa News

    छ्याता
    फेसबुक छ्याता