कंग द्यःछेंया उलेज्या

 

येँ महानगरपालिकाया मेयर भाजु विद्यासुन्दर शाक्यं कंग अजिमा द्यःछेँ उलेज्या बैशाख १५ गते शनिबाः छगु ज्याझ्वःया दथुइ यानादिगु दु । यट्खाय् दुगु कंगद्यःछें पुननिर्माण क्वचागुलिं कंग अजिमा खलकं याःगु ज्याझ्वलय् मेयर शाक्य मूपाहाँ कथं झाःगु खः । पुननिर्माणया ज्या धमाधम जुयाच्वंगु व न्याकनं मरुसतःया पुननिर्माण न्ह्याकेगु वय्कलं न्ह्यथनादिल । सरकारं याइ धका पियामच्वंसें स्थानिय स्तरं हे ज्या न्ह्याकुसा वडा व महानगरं साथ बीगु वय्कलं बचं तकं बियादिल ।


वडा नं १८या वडाध्यक्ष न्हुछेकाजी महर्जनं द्यःछें ल्ह्वनेत खलःया दुजःपिंसं हे झिद्व झिद्व तयाः ज्या सुरुयाना थौं सम्पन्न जुगुलिं ग्वाहालि यानादिपिंत सुभाय् ब्यूसें लसकुस न्वचु बियादिगु खः ।
यें महानगरपालिका हनुमानध्वाखा दरबार संरक्षण कार्यक्रमया ग्वाहालिइ थुगु पुननिर्माण क्वचागु खः । उलेज्या याय्गु इलय् पाहाँ कथं प्रदेश ३ क्षेत्र नं. ८ या प्रदेश सांसद राजेश शाक्य, २४ वडाया वडाध्यक्ष भाजु बालकृष्ण श्रेष्ठ, हनुमानध्वाखा दरवार क्षेत्र संरक्षण कार्यक्रमया नायः भाजु उदय पसखल, खलःया दुजःपिं व गुरुपिं झायादिगु खः ।

थ:गु वडाया बिकाश वडाबासीतय्सं याय्फुगु बांलागु दसु थुगु ज्यां बिउगु व थज्यागु ज्या याना यंकेत महानगरपालिकां फुक्क वडायात बजेटया व्यवस्था याय्मागु ज्याझ्व: न्ह्याकामी वडा १५ या वडाध्यक्ष इश्वरमान डंगोलं न्ह्यथनादिल।






किपा : बालकृष्ण महर्जन 

Share on Google Plus

News: Tuladhar Bigen

    छ्याता
    फेसबुक छ्याता