पत्रकार दबू येँ जिल्लाया ग्वसालय् थौं शुक्रवाः सुथय् येँया जगतसुन्दर ब्वनेकुथिइ नेवाः जः लय्पौ पिदंगु दु ।जगतसुन्दर ब्वनेकुथिइ पत्रकार दबू येँ जिल्लां येँय् छगू ज्याझ्वः यासें नेवाः जः लय्पौ विमोचन याःगु दु । उगु विमोचन ज्याझ्वलय् मु पाहाँ कथं प्रदेश ३ क्षेत्र नम्बर ९ येँपाखें प्रतिनिधि सभाय् निर्वाचित सभासद् कृष्णगोपाल श्रेष्ठं झायादिगु खसा पाहाँ कथं प्रतिनिधि सभा सदस्य जीवनराम श्रेष्ठ, प्रदेश सभा सदस्यपिं बसन्त मानन्धर व राजेश शाक्य, पूर्व राज्यमन्त्री तीर्थराम डंगोल, वरिष्ठ पत्रकार सुरेशकिरण मानन्धर, राजु शाक्य व सुजीव वज्राचार्यलिसेंया उपस्थित दुगु खः । ज्याझ्व:या सभापति पत्रकार दबू येँ जिल्लाया नायः नातिकाजी महर्जनं यानादिगु ख।
ज्याझ्वलय् नेवाः जः लय्पौया विमोचन प्रदेश नम्बर ३य् येँ जिल्लापाखें प्रतिनिधि सभा व प्रदेश सभाय् निर्वाचित नेवाः सभासद् लिसें संचार ख्यलय् सक्रिय वरिष्ठ नेवाः पत्रकारपिन्सं मंकाः रुपं यानादिल । बिमोचन लिपा थ:गु नुगः खँ तसें प्रदेश ३ क्षेत्र नम्बर ९ येँपाखें प्रतिनिधि सभाय् निर्वाचित सभासद् कृष्णगोपाल श्रेष्ठं राज्यपाखें संचार क्षेत्रय् उपलब्ध सुविधा धयागु नेवाः संचारकःमिपिनिगु नं अधिकार खःगु धयादिल । नेवाः संचारकःमिपिन्सं नं राज्यपाखें उपलब्ध स्वास्थ्य लगायतया थीथी सुविधा धयागु थःगु अधिकार कथं कायेमाःगु खँ सभासद् श्रेष्ठं न्ह्यथनादिल । ‘विशेष यानाः नेवाः संचारकःमिपिन्सं स्वास्थ्य सम्बन्धि समस्या जुइबलय् राज्यपाखें उपलब्ध सुविधा कायेगु पाखे ध्यान हे मब्यूगु खनेदु । व सुविधा धयागु नेवाः पत्रकारपिनिगु नं अधिकार खः।
ज्याझ्वलय् पत्रकार दबूया सल्लाहकार बरिष्ठ पत्रकार पुष्कर माथेमां सानुकाजी महर्जनयात लुमंकाः नेवाः पत्रकार दबू नं बांलाःगु ज्या याःगु विचाः प्वंकादीगु खः । अथेहे, नेवाः पत्रकार दबूया मू नायः श्रीकृष्ण महर्जनं पत्रपत्रिका पिथनेगु छक्वःया नितिं थाकू मजू, निरन्तर पिथने तकसं थाकू धयादिसें येँ जिल्लाया पत्रकारपिन्सं थ्व खँयात विचाः यानाः ज्या याइगु भलसा प्वंकादिल । थुगु नेवाः जः लय्–पौया सम्पादन विराजकाजी राजोपाध्याय यानादीगु ख: नापं आ थो निरन्तर पिथनेगु ज्या जुइगु खँ नं प्वंकादिल ।ज्याझ्वलय् लसकुस येँ जिल्लाया सचिव प्रजित शाक्यं यानादिगु खःसा पत्रकार दबू या केन्द्रिय दुजः विगेन तुलाधरं न्ह्याकादीगु खः।
0 Comments:
Post a Comment