रमेश ताम्राकार ६७ दँया वैसय् मन्त । श्रद्धाञ्जलीया नितिं शनिबाः माघ १३ गते जमलया राष्ट्रिय नाचघरय् तइगु


नांजाःम्ह म्येहालामि रमेश ताम्राकार माघ ११ गते बिहिबाः चान्हे ११.५० बजे ६७ दँया वैसय् आकाझाकां मन्त । वयेकया पार्थिव शरिरयात अन्तिम श्रद्धाञ्जलीया नितिं शनिबाः माघ १३ गते जमलया राष्ट्रिय नाचघरय् सुथः १०ता इनिसें न्हिनसिया १ ता इतक तय् त्यंगु दु । वय्कं सिभिएर हर्ट अत्याक जुया मदुगु जानकारी वयेकया भिन्चा मे हालामि सलिल तुलाधरं नेवाः न्युज यात जानकारी बियादिल ।

मदुम्ह ताम्राकार नेपालभाषा संगीत ख्यलय् जक मखु, खस नेपालीभाषाया संगीत ख्यलय् नं अतिकं लाेकंह्वाः । वयेकया नेपालभाषाया म्येचा ककटेल १ निसें ३ तक पिद‌ंगु दुसा ककटेल ४ पितहयेगु कुतः यानाच्वनादिगु खः ।
२००७ साल अाश्विन १९ गते बुम्ह ताम्राकारं सन् १९७२ निसें रेडियो नेपालय् सांगितिक करिअर न्ह्याकादीगु खसा राष्ट्रिय नाचघरय् जिएम तकं जुयादीधुंकूम्ह खः। वय्कलं त्रिभुवन युनिभर्सिटीपाखें गणितय् एमएस्सी व म्यानेजमेन्टय् एमए तक अध्ययन यानादीगु खःसा वय्कलं लिड्स युनिभर्सिटी यूके अध्ययन यानादीगु दु । 
बिहिबाः सनिल ६ ता इलय् प्वाः स्यागुलिं बल्खुया बयाेडा अस्पतालय्  चिधिम्ह काय् सगुन नाप झायादिगु खःसा वयेक अन हृदयाघाटं मदुगु खः । वयेक ताः इनिसें डाइबिटिज व ग्यास्त्रकया ल्वगि खः । वयकःया सीम्ह टिचिङ अस्पटालय् तयातःगु दु । 

वयकःया निम्ह काय् दीसा तधिम्ह काय् सगुन अमेरिकाय् दु । वयेकया जहान अञ्जना भारतय् वनाच्वंगु शुक्रबाः न्हिनय् १२ः३० ता इलय् लिथ्यंगु खः । अन्तिम संस्कार कन्हे न्हिनय् तधिम्ह काय् थ्यंका याइगु जुगु दु । सगुन ताम्राकार हेलाे पुजा म्येया नितिं लाेकंह्वाः ।

वयेकया लिपांगु अन्तर्वार्ता रेडियाे उपत्यका ८७‍.६ मेगाहर्जय जिं थम्हं हे उदाय् सः ज्याझ्वया नितिं कयागु खः । उगु खँल्हाबल्हा माघ १० गते बुधवाः प्रशारण जुगु खःसा ११ गते पुन प्रशारण न्हिनय् ५ ता इ निसें ६ ता इ तक जुगु खः । उगु खँल्हाबल्हा थन न्यनादिसँ ।

Share on Google Plus

News: Tuladhar Bigen

    छ्याता
    फेसबुक छ्याता

0 comments:

Post a Comment