भारत भ्रमणय् दुपिं मधेशी मोर्चाया नेतातयेत पहाड ब्यागलं याना प्रदेश मफ्वनेत भारतीय नेतातयेसं छ्याता ब्युगु दु । समग्र मधेसयात पहाडनाप ब्यागः तयाः निगु प्रदेश देकेमागु माग पूवंकेत भारत थ्यंपिं मोर्चाया नेतातयेत भारतीय नेतातयेसं थज्यागु छ्याता ब्युगु खः । आन्दोलन यानाच्वंपिं मधेसी मोर्चाया नेतातयेसं भारतीय जनता पार्टीया बरिष्ठ नेता भगतसिंह कोसियारीं पहाडनाप पूवंक ब्यागलं मधेस प्रदेश मदेकेत छ्याता ब्युगु खः ।
मोर्चाया नेतातयेसं थौं यागु नापलायेज्याय् मधेसय् निगु प्रदेश देकुसां पहाडतकं स्वाना प्रदेश देकेत छ्याता ब्युगु दु । पहाडनाप ब्यागः प्रदेश देकुसा राष्ट्रिय एकता कायम मजुइगु व आन्दोलनया औचित्यनं मदइगु न्ह्यथंगु दु । कोसियारीं आ छवाः दुने नेपालय् सहमति जुइगु व आपूर्ति ब्यवस्था सहज जुइगु दाबी यानादिल । कोसीयारीं नेपाया समस्या नेपालया राजनीतिक दलं ज्यंकेमागुलिं थुकि भारतया छुं ल्हा मदइगु न्ह्यथंगु दु । वयेकलं मोर्चाया नेतातयेसं जातीयता व क्षेत्रीयताया खँ ल्ह्वनां खँ स्यंगुलिं न्हापा नेपामी जुया विनासर्त बार्ताय् च्वनेत नं छ्याता ब्युगु दु ।
अथेहे भारतीय सचिव एस जयशंकरं भारतया नां स्वाना आन्दोलन मयायेत छ्याता ब्युगु दु ।
थुखे नेपाया आन्तरीक मुद्धा भारतयात लःल्हावंगु धासें राष्ट्रिय मुस्लिम गठबन्धन नं मधेसी मोर्चां ब्यागः जुगु दु । वंगु भदौ ३ गते मोर्चाय् दुहाँ वना मधेस आन्दोलनय् ब्वति कागु गठबन्धन राष्ट्रिय स्वाधीनताय् न्ह्यसः वइकथं मोर्चां ज्या यागु व मानवीय संकट जुइगु धासें पिहाँ वंगु खः ।
तमलोपाया केन्द्रिय दुजः तकं जुयादिम्ह गठबन्धन नायः शमिम मियाँ अन्सारीं थौं पत्रकार सम्मेलन याना थ्व खँ सार्वजनिक यानादिगु खः ।
0 Comments:
Post a Comment