यलय न्हुदँ ११३४ या लसताय भिन्तुना जुलुस व सभा

नेसं ११३४ न्हूदंया लसताय् न्हूद समारोह समिति यलया ग्वसालय् यल नगरय् सांस्कृतिक बाजंलिसें थीथी समाज, खलः, पुचःनापं थीथी व्यक्तिपिनिगु सहभागिताय् सांस्कृतिक नसंचा उलेगु ज्या जूगु दु । यलया मंगलबजारय् मुनाः न्ह्याःगु उगु भिंतुना जुलुस पूच्व थ्यंकाः नेपाल संवत्या संस्थापक शंखधर साख्वाःया झ्वाताय् स्वां देछायेगु ज्या जूगु खः ।

जुलुस मंगलबजार लिथ्यंकाः कात्ति दबुली सभाय् परिणत जूगु खः । संस्कृतिविद् सत्यमोहन जोशीया सभापतित्वय् न्ह्याःगु उगु सभाय् सूचना तथा संचारमन्त्री रामकुमार श्रेष्ठ मूपाहां कथं झाःगु खः । ज्याझ्वलय् न्ववासें वय्कलं नेपाल संवत्यात व्यवहारय् छ्यलेगु निंतिं थम्हं माःगु कुतः यायेगु बचं नं बिया–दिल ।

ज्याझ्वलय् समाजसेवी मोतिलाल शिल्पकारं नीस्वनादीगु मोति न्हूद सिरपाः मन्त्री भाजुं जुलुसय् ब्वति कयादीपिं समाज व खलः, पुचःमध्ये न्हाप, लिउ व लियांलिउ लाःपिंत लःल्हायेगु ज्या जूगु ख । अथे हे बाजनय् न्हाप, लिउ व लियांलिउ सिरपाः त्याकेत ताःलाःपिंत यल उपमहानगरपालिकाया कार्यकारी प्रमुख मोहननाथ मास्कें सिरपाः लःल्हानादीगु खः ।

Share on Google Plus

News: Newa News