न्हूगु सत्ता गठबन्धनपाखें १६ म्ह मन्त्रीतयेसं बुधबाः राष्ट्रपति रामचन्द्र पौडेलपाखें पद व गोपनीयताया शपथ काःगु दु।
प्रधानमन्त्री पुष्पकमल दाहाल प्रचण्डं बुधबाः यानादीगु मन्त्रिपरिषद विस्तारकथं शपथ कायेत ल्यँ दुपिं १६ म्ह मन्त्रीं शपथ कायेवं २० म्ह दुजःया मन्त्रिमण्डल जूगु दु।
प्रधानमन्त्री दाहालं एमालेया ८ म्ह, माओवादीया ६ म्ह, रास्वपाया ४ म्ह व नेकपा समाजवादीया २ म्ह दुज मन्त्रिमण्डल तयादीगु दु ।
प्रधानमन्त्री सचिवालय कथं एमालेया रघुवीर महासेठ उपप्रधानमन्त्री नापं भौतिक पूर्वाधार मन्त्री जुयादीगु दु । अथेहे पदम गिरी कानुन, न्याय तथा संसदीय मामिला, हरि उप्रेती रक्षा, भगवती चौधरी महिला, बालबालिका तथा ज्येष्ठ नागरिक मन्त्रालय, राजेन्द्र राई खानेपानी मन्त्रालय, दामोदर भण्डारी उद्योग, वाणिज्य तथा आपूर्ति, ज्वालाकुमारी साह कृषि तथा पशुपक्षी व बलराम अधिकारी भूमि व्यवस्था, सहकारी तथा गरिबी निवारण मन्त्रालयया जिम्मा ब्यूगु दु । अथेहे माओवादीया नारायणकाजी श्रेष्ठ उपप्रधानमन्त्री तथा परराष्ट्रमन्त्री जुयादीगु दुसा वर्षमान पुन अर्थ, शक्तिबहादुर बस्नेत ऊर्जा, जलस्रोत तथा सिँचाइमन्त्री, रेखा शर्मा सञ्चार तथा सूचना प्रविधि व हितबहादुर तामाङ संस्कृति, पर्यटन तथा नागरिक उड्डयनमन्त्री जुयादीगु दु।
राष्ट्रिय स्वतन्त्र पार्टीं सभापति रवि लामिछाने उपप्रधानमन्त्री तथा गृहमन्त्री जुयादीगु दुसा डीपी अर्याल श्रम, रोजगार तथा सामाजिक सुरक्षा मन्त्री, विराजभक्त श्रेष्ठ युवा तथा खेलकुद व सुमना श्रेष्ठ शिक्षा, विज्ञान तथा प्रविधि मन्त्री जुयादीगु दु।
अथेहे नेकपा समाजवादीया भानुभक्त जोशी सामान्य प्रशासन व धनबहादुर बुढा सहरी विकासमन्त्री जुयादिल।
थ्व दथुइ नेपाली कांग्रेसया सभापति शेरबहादुर देउवां गठबन्धन देकेगु रणनीति कथं चिधंगु दलतयेत थःगु पक्षय् दनेत इनाप यानादिल ।
डा सिके राउतया जनमत पार्टी, रेसम चौधरीया नागरिक उन्मुक्ति पार्टी (नाउपा) व महन्थ ठाकुरया लोकतान्त्रिक समाजवादी पार्टी (लोसपा) नाप सभापति देउवां बुधबाः नापलाना इनाप यानादीगु खः ।
0 Comments:
Post a Comment