डडेल्धुराया अजयमेरुकोट संरक्षण पियाच्वंगु दु । स्वंगुगु शताब्दीया जुजु नागी मल्लं डोटी राज्य न्ह्याकेत देकुगु अजयमेरुकोट आः जीर्ण अवस्थाय् दु । जुजु मल्लं ताँन्वःगु इलय् च्वनेत देकुगु उगु कोट जीर्ण जुया तनावनेत्यंगु दु । मल्ल जुजुया दरबार, लानीं लानीपुखुलिइ म्वल्हुइत वनीगु गुफा, सल तयेगु सलख्वः, नौला, देवलनापंया संरचना नास जुगु दुसा गुलि जीर्ण अवस्थाय् दु ।
कोटय् वनेगु लँपु धासा नेपाली सेनाया ग्वाहाली देकाच्वंगु दु । पुलांगु कला व शैली देकातःगु भौतिक व प्राचीन धरोहरया इतिहास तनावनाच्वंगु दु ।
डडेल्धुरा सदरमुकामं न्हेगु किलोमिटर पश्चिमय् दुगु हाटगाँया बस्ती व खुसिया दथुइ प्राचीनस्थलया कथं अजयमेरुकोट च्वनाच्वंगु दु ।
बाइसे चौबीसे राज्यकालीन डोटी राज्यया राजधानी कोट प्राचीन कलाया उत्कृष्ट संयोजनं देकातःगु दरबार, देवल, लःया न्वाला, सलख्वः, बैठक कक्ष, पुखु आदि वास्तुकलायात पुनःनिर्माण यायेफःसा कोट आन्तरिक व बाह्य पर्यटकया आकर्षणया केन्द्र जुइफइगु स्थानीयतय् धापु दु ।
जीर्ण संरचनाय् आः नं १० फिटस्वयां ताःहाकःगु ल्वहँत दु ।
स्थानिय अजयमेरु गाउँपालिकाया पहलय् भागेश्वर व अमरगढी नगरपालिकाया मंका मुँज्या च्वना कोटया संरचना जीर्णोद्धारया नितिं पहल न्ह्याकागु गाउँपालिकाया अध्यक्ष उमेशप्रसाद भट्टं न्ह्यथनादिल । च्याक्वःगु शताब्दीया जुजु नागि मल्लं देकुगु ऐतिहासिक दरबारया आः भग्नावशेष जक ल्यँ दनिसा उगु लागाय् देगः जीर्ण जुइधुंकुगु दु । पुरातत्व विभागं राष्ट्रिय सम्पदा धलखय् तयेत पहल यानाच्वंगु जूसां अजयमेरुकोटय् दुगु ऐतिहासिक व कलात्मक मूर्तिया संरक्षणया लागि छुँ पहल मजुगु स्थानीयया धापु दु । सरकारं कोटया संरक्षण व संवर्द्धनया लागि गुरुयोजना देकेमाःगु स्थानीय बासिन्दाया माग दु ।
रासस
0 Comments:
Post a Comment