बाँलाक बुका जक ला नयेत चिकित्सकया छ्याता


नेपालय् बर्डफ्लु दुहाँवःगुलिं ला बाँलाक्क बुका जक नयेत चिकित्सकं छ्याता ब्यूगु दु ।

बर्डफ्लु पन्छीपाखें मनुयात सरे जुइगु ल्वय् जुइगुलिं विशेष सतर्कता कायेमाः । वरिष्ठ छाती रोग विशेषज्ञ डा. निरज बमया कथं पन्छीया ला नया बर्डफ्लुया भाइरस जुइफूगुलिं बाँलाक्क बुकाः जक नयेमा । चिकित्सकया कथं बर्डफ्लुया भाइरस ७२ डिग्री सेल्सियस तापक्रमय् सीगु अध्ययनं क्यंगु दु । उकें ७२ डिग्री सेल्सियसस्वयाँ च्वयेया तापक्रमय् बुका नयेमा ।

बर्डफ्लु जुलकि निमोनिया व सेखँ थें लक्षण खनेदइ । चिकुलाय् झन असर याइगु जुगुलिं पन्छी व पन्छीजन्य पदार्थया सम्पर्कय् मवनेत व सरसफाइलय् ध्यान बीत चिकित्सकं छ्याता ब्यूगु दु ।

बर्डफ्लु खा, हँय्, टर्की, चखुँबखुँ नापंया पन्छीइ जुइगु सरुवा ल्वय् खः । बर्डफ्लुया भाइरस ला, पपु, न्हि, लाः, सुली, दाना, खेँ, खेँ तइगु क्रेट, दाना तैगु बोरा पाखें सरेजुइ ।

येँया तारकेश्वर नगरपालिका–७ य् किसानं लहिनातःगु खा व टर्कीइ बर्डफ्लुया संक्रमण पुष्टि जुइधुंका २ द्व अप्व पन्छी नष्ट याःगु खः ।

थ्व न्ह्यः हे भारतय् बर्डफ्लु लुइधुंका सीमा लागाय् कडाइ याःगु खः । पशु सेवा विभागं भारतपाखें पन्छीजन्य वस्तुया आयात प्रतिबन्धतकं याःगु खः ।


Share on Google Plus

News: Newa News

    छ्याता
    फेसबुक छ्याता