थौं निसें लँ पना जुइपिंत कारवाही याइगु


त्वाःत्वालय् पं, खिपः व कथि तयाः लँ बन्द याइपिंत प्रहरीं कारवाही याइगु जूगु दु । कोरोनाया संत्रास हलिंन्यंकं जुयाच्वंगु इलय् त्वाःयात सुरक्षा बीगु नामय् थुकथं मू लँ हे बन्द याना मनुत पाः बियाच्वनाच्वंगु खः ।

छुँ दिं निसें थुकथं येँया कालिमाटी, ताहाचः, रवि भवन, लगं, खिचापुखू आदि दुनेया लागाय् लँ बन्द याःगु खनेदूगु खः । लकडाउनया इलय् अतिआवश्यक ज्याया नितिं वःपिंत तकं लितछ्वयेगु व दुव्र्यवहार यायेगु अप्वःसेंलि थुकिया विरोध जूगु खः । मजिमगाःगु ज्याय् वनिपिंत समस्या जक मखु आपतकालीन स्थितिइ उद्धार यायेत तकं थाकुइगुलिं अथे मयायेत गृह मन्त्रालयं इनाप याःगु दु ।

गनं नं लँ पनाच्वंगु खन धाःसा ज्वनाः कारवाही यायेगु प्रहरी प्रशासनयात उजँ तकं ब्यूगु दु । अपरिचित मनूत वल धाःसा स्थानीय मनूतयेसँ स्थानीय निकाय व स्थानीय जनप्रतिनिधि नाप जाना पाः बीमागु न्ह्यथंगु दु ।
सरकारं घोषणा यानातःगु लकडाउन पालना मयाःसा ज्वनाः कुने फइगु अधिकार प्रहरीयात बिउगु दु ।


Share on Google Plus

News: Newa News

    छ्याता
    फेसबुक छ्याता