कोरोना भाइरस (कोभिड–१९) परीक्षण पुल टेष्टिङं यायेगु सरकारं निर्णय याःगु दु । स्वास्थ्य तथा जनसंख्या मन्त्रालयया प्रवक्ता डा. विकास देवकोटाया कथं पुल टेष्टिङ यायेत फुक्क निकाययात उजं बी धुंकुगु दु । आ म्हो रिएजेन्टं नं यक्व परीक्षण यायेफइ ।
पिसिआर विधिइ हे पुल टेष्टिङ यायेत्यंगु खः । आः छम्ह मनुया स्वाबयात जक टेष्ट याना वयाच्वंगु खः । तर पुल टेष्टिङय् छम्ह स्वयां अप्व मनुया स्वाबयात छथाय् तया टेष्टिङ यायेत्यंगु दु । स्वाब न्हाय् व गःपतं जम्मा याइ ।
थुकथं छगु पुलं रिपोर्ट नेगेटिभ वःसा उकि दुथ्याःपिं फुक्क मनु कोरोनां मुक्त धैगु पुष्टि जुइ । तर पोजेटिभ वःसा इपिं मध्ये सुं छम्ह पोजिटिभ धका सीका काय् फू । संकलित स्वाबमध्य हाकनं व्यक्तिगत परीक्षण याना कोरोना पोजिटिभ मनु लुइकि । थुकिं कोरोना मदुपिं यक्व मनुत छक्वलं लुइकेफइ ।
पीसीआर टेष्ट यायेत किट म्हो जूगुलिं अर्नहार्ड सेइफ्राइडया नेतृत्वय् जर्मनीइ रेड क्रस ब्लड डोनर सर्भिस व युनिभर्सिटी हस्पिटलया इन्स्टिच्युट फर मेडिकल भाइरोलोजीया अनुसन्धानकर्तां कोरोना परीक्षणय् थुकथं पुल टेष्टिङ विधिं अध्ययन याःगु खः ।
हेल्थकेयर इन युरोप डटकमया कथं जर्मनीइ थ्व विधिया छ्यलाबुला याना न्हिथं प्यंगु लखतक मनुतय् कोरोना परीक्षण यानाच्वंगु दु ।
नेपालय् नं पुल टेष्टिङ याना म्हो खर्च व म्हो किटय् यक्व टेष्टिङ यायेफइ । थुकिया अत्यधिक कार्यान्वयनं कन्हेनिसें यक्व नतिजा वैगुलिइ शंका मदु ।
छ्याता
फेसबुक छ्याता