सरकारं लिम्पियाधुरा, लिपुलेक व कालापानी लागा कःघाःगु नेपाःया न्हूगु नक्सा पारित याःगु दु । सोमबाः च्वंगु मन्त्रिपरिषद बैठकं नक्सा पारित याःगु सरकारया प्रवक्ता नापं सञ्चार व अर्थमन्त्री डा. युवराज खतिवडां न्ह्यथनादिल ।
उत्तरी पूर्व व पश्चिमी नक्सा नापं राजनीतिक व प्रशासनीक प्रवन्ध कःघाःगु नक्सा आः नेपाःया दक्व प्रशासनीक प्रवन्धय् लागू जुइगु वयेकलं न्ह्यथनादिल ।
वयेकःया कथं न्हूगु नक्साय् नेपाःया संघीयताकथं प्रदेश व स्थानीय तह कःघानातःगु दु । आः निसान छापत व सरकारी ज्याय् छ्यलाबुला यायेत नक्सा, पाठ्यपुस्तक व सार्वजनिक ज्याखँय् हैगु नक्सा ह्यूपा जुइ ।
भारतं वंगु नोभेम्बरय् थःगु न्हूगु राजनीतिक नक्सा जारी याःगु इलय् लिम्पियाधुरायात थःगु लागा क्यंगु खः । नेपालय् थुकिया विरोध जुया संसदीय समितिं नेपाली भूभागयात कःघाना नक्सा देकेत सरकारयात उजँ तकं ब्यूगु खः ।
सरकारं कूटनीतिक नोट छ्वया सीमा विवादबारे परराष्ट्र सचिवस्तरीय संयन्त्रया बैठक च्वनेत भारतयात मिति प्रस्ताव तकं याःगु खः । नेपालं कूटनीतिक सम्वादं समस्या समाधान यायेगु न्ह्यथंसां भारतं सचिवस्तरीय संयन्त्रया मुँज्या तकं मतः ।
भारतं तिब्बतया मानसरोवर वनेत लिपुलेकया नेपाली भूमि अतिक्रमण याना सतक उलेज्या तकं यात । सरकारं थथें वार्ता यायेगु धाःसां भारतं कोरोना संकटलिपा धाःगु दु ।
जेठ २ गते संसदय् सरकारं न्ह्यब्वःगु नीति व ज्याझ्वलय् लिम्पियाधुरा, कालापानी व लिपुलेक नापंया नक्सा जारी यायेगु प्रतिवद्धता प्वंकुगु दु । व हे कथं भूमिसुधार मन्त्रालयं प्रस्ताव न्ह्यब्वःगु खःसा मन्त्रीपरिषदं पारित याःगु दु ।
छ्याता
फेसबुक छ्याता