न्हापांम्ह मातृभाषी पत्रकार धर्मादित्य धर्माचार्यया जन्म जयन्ती व मातृभाषा पत्रकारिता दिवसया ज्याझ्वः स्थगित


न्हापाम्ह नेपालभाषाया पत्रकार धर्मादित्य धर्माचार्यया जन्म जयन्ती व मातृभाषा पत्रकारिता दिवसया ज्याझ्वःत स्थगित जूगु दु । छगू शताब्दि न्ह्यः नेपालभाषा पत्रकारिता न्ह्याःगु दिं कथं ने.सं. १०२२ बछलाथ्व १४ (थुगुसी २०७७/०१/२५) कुन्हु मातृभाषा पत्रकारिता दिवस हनावयाच्वंगु दु । थुगुसिया ५ क्वःगु मातृभाषा पत्रकारिता दिवस  कोरोना संक्रमण जोखिम व लकडाउनया हुनिं र्याली, धर्मादित्य धर्माचार्यया झ्वाताय् स्वां देछायेगु, सभा व मातृभाषा पत्रकारिता सम्मेलन स्थगित जूगु दिवस हनाच्वंगु नेवाः पत्रकार राष्ट्रिय दबूया नायः सुरजवीर बज्राचार्य‌ं न्ह्यथनादीगु दु । अथेहे दबूया यल कचापाखें लःल्हाःगु धर्मादित्य पत्रकारिता सिरपा तकं स्थगित जूगु दु ।

नेपालभाषाया न्हापांम्ह पत्रकार धर्मादित्य धर्माचार्य (जगतमान वैद्य) या बुदिं लाकाः हनेगु ज्या न्ह्याःगु थुगु दिवस थीथी मातृभाषी पत्रकारतय्गु नितिं नं छगू समर्पण, छगू उर्जा जुयाः न्हापांम्ह मातृभाषी पत्रकार नालाः थुगु दिवस हनेगु ज्याया न्ह्यलुवाः नेवाः पत्रकारतय्गु राष्ट्रिय संगठन नेवाः पत्रकार राष्ट्रिय दबू खःसा थुकी एकमत आदिवासी जनजाति पत्रकार महासंघ आवद्ध सकल भाषाभाषी पत्रकारतय्गु संगठननाप मधेसी पत्रकार समाजं क्यंगु दु ।

ने.सं. १०४५ स्वांया पुन्हि खुनुनिसें भारतया कलकत्ताय् च्वनाः ‘बुद्ध धर्म’ नांया धार्मिक पत्रिका पिकयाः वया निदँ लिपा थुगु पत्रिकायात हे ‘बुद्ध–धर्म व नेपालभाषा’ धकाः धर्म व साहित्यया पत्रिका सम्पादन याःम्ह धर्मादित्य धर्माचार्य ने.सं. १०२२ बछलाथ्व चतुर्दशी खुन्हु सप्तपुर महाविहार, चिकंबही, यलय् जन्म जुयादीम्ह ब्यक्तित्व खः । अनन्त जीवन दुम्ह वय्कःया भौतिक शरीर थुगु भूमिं बिदा काःगु ने.सं. १०८३ दिल्लागा अमाई खुन्हु खः । वय्कलं खय्भासंं ‘हिमाली बौद्ध’, अंग्रेजीं ‘बुद्धिष्ट इण्डिया’ पत्रिका नं पिथनादीगु खः ।

वय्कःया योगदान आपालं ख्यलय् दुगु लुमंकेबलय् वय्कःयात देछानातःगु पदवी एम्. ए., हिन्दी साहित्य रत्न, बौद्ध साहित्य रत्न, एफ.आर. इकन (लण्डन), धर्म आदित्य, सद्धर्मरत्नाकर, एफ.बि.एम.(बर्मा), कविराज, भिषगरत्न, भिषगारत्न, डी.डी.(होमियो) नं लुमंकेमाःसा वय्कःयात नेपाःया बौद्ध जगतया न्हापांम्ह सुधारवादी ब्यक्तित्व, किन्दो विहारया जीर्णोद्धारया मुख्यम्ह आयोजक, नेपालय् स्वांया पुन्हि खुनु बुद्ध जयन्तीकथं हनेगु थिति हःम्ह, नेपाःगालय् बुद्धधर्म उद्धार संघ, बुद्धोपासक संघ, बुद्धोपासिका संघ दय्कूम्ह, कलकत्ताय् नेपाली बुद्धमार्गी संघ दय्कूम्ह, दार्जिलिंगय् छगू कन्या विद्यालय चाय्कूम्ह, कालिम्पोंगय् उपासक संघ दय्काः पुस्तकालय तःम्ह, कलकत्ता व पटनाया विश्वविद्यालयस नेपालभाषा दुकाय्त कुतः याःम्ह थें जाःगु आपालं ज्यानाप वय्कःया गुण थौं नं सकसिनं लुमंकेगु याः ।
Share on Google Plus

News: Anonymous

    छ्याता
    फेसबुक छ्याता