परिक्षण दायरा अप्वयेके साथ साेमबाः न्हिछि दुने लुइकल २४ संक्रमित, फक्कं भारतं सुलासुला वःपिं


नेपालय् थप १३ म्ह कोरोना भाइरस (कोभिड १९) संक्रमण पुष्टि जुइ नापं सोमबाः छन्हुं हे संक्रमितया ल्याः २४ म्ह थ्यंगु दु । २४ घौ दुने परिक्षण आःतकया हे दकलय् अप्व ९०० थ्यंगु दु ।

राष्ट्रिय जनस्वास्थ्य प्रयोगशालाय् याःगु परीक्षणय् कपिलवस्तुइ ६, रुपन्देहीइ ६ व बर्दियाय् १ म्ह कोरोना संक्रमण पुष्टि जूगु स्वास्थ्य तथा जनसंख्या मन्त्रालयं न्ह्यथंगु दु ।

थुपिं मध्य कपिलवस्तुइ हे छन्हुं १६ म्ह संक्रमित लूगु खः । सक्रमितपिं यशोधरा गाउँपालिका वडा नं. ५ व बुद्धभुमि नगरपालिका वडा नं. ७ व १० या खः । इपिं १८ दँ निसें ३४ दँ तकया मिजँपिं खः । संक्रमित फुक्कं लकडाउनया इलय् भारतं सुला सुला नेपाः वःपिं खः ।

सनिल वःगु रिपोर्टय् यशोधरा गाउँपालिका – ८ व वुद्धभूमि नगरपालिका ७ या १५, १९, २३, ३०, ३२ व ३८ दँया मिजँ जूगु पुष्टि जूगु दु । थ्व नापं कपिलवस्तुइ संक्रमितया ल्याः २१ म्ह थ्यंगु दु ।

संक्रमित अप्वय् नापं कपिलवस्तु जिल्लायात जेठ ५ गतेतक सिल याःगु दु ।

अथेहे रुपन्देहीया सम्मरीमाइ गाउँपालिका ७ व लुम्बिनी साँस्कृतिक गाउँपालिका ६ या २४, २६, २७, ३०, ३२ व ४० दँया मिजँपिंके कोरोना संक्रमण खनेदूगु दु ।

थुपिं नं लकडाउनया इलय् हे भारतं सुलासुला नेपाः वःपिं खः ।

थ्व नापं नेपाःया काेभिड १९ संक्रमितया ल्याः १३४ थ्यंगु दु ।


Share on Google Plus

News: Newa News

    छ्याता
    फेसबुक छ्याता