प्रज्वल शाक्य
कोरोना भाइरसया संक्रमण नेपालय् निक्वःगु खुसिइ खनेदत । फ्रान्सं नेपाः वःम्ह १९ दँया ब्वनामियात चैत ९ गते कोभिड १९ पोजितिभ जूसेंलि टेकु अस्पतालया आइसोलेसनय् चैत १० गते भर्ना याःगु खः । थ्व दथुइ संक्रमितया छेँजः, थःथिति व नापलाःपिं मेपिंत क्वारेन्टाइनय् तयेत सरकार न्ह्यच्यूगु दु ।
तर लिबाय् धुंकल ? व हे जुया चैत ११ सुथ खुता इलं निसें नेपाःयात लकडाउन यायेत्यंगु दु । आः अत्यावश्यक बाहेक छें नं पिहां वय् दइमखु । छम्ह मनु संक्रमित जुइ साथ नेपाः छगुलिं लकडाउन यायेमाल । थ्व पक्का नं थप संक्रमण जुइके मबीत बांलाःगु पलाः खः । तर दे हे लकडाउन यायेमाःगु स्थिति गुकथं वल ? थुकिया दोष सुनां कायेगु ?
चैत ४ गते नेपाः लिहांवम्ह ब्वनामी चैत ६ गते थः नापं फ्रान्सं लिहांवम्ह भियतनामया पासायात कोभिड १९ संक्रमण जूगु सीका टेकुइ परिक्षणया नितिं वंगु खः । थःत छुं नं लक्षण मक्यंसां शंकाया भरय् क्यं वंगु खःसा वयेक संक्रमित जूगु सीदुगु खः । थ्व दौरान वयेक छेँ हे क्वारान्टाइनय् च्वनाच्वंगु धाःगु दु । आः वयेक अस्पतालय् उपचार यानाच्वंगु दु । थुकथं विदेशं वःपिं तर लक्षण मक्यंपिं कोरोना संक्रमित नेपालय् गुलि दइ ? इमिगु अनुगमन सरकारं गुबलय् याइ ? इपिं नापनापं थःथिति, पासाभाइया अनुगमन गथे याइ ?
हलिंन्यंकं महामारीया संज्ञा काःगु कोभिड १९या संक्रमण नेपालय् न्हापा हे खनेदूगु खः । चीनया उहानं नेपाः वःम्ह छम्ह मनुखय् कोरोना संक्रमण खनेधुंका हे सरकारं कडाइ यायेमाःगु खः । तर उम्ह मनु लना वंगु व थप संक्रमण जूपिं खनेमदुगुलिं अवस्थायात सामान्य कथं काल । चीनया उहानं नेपामिपिंत उद्धार यायेधुंका नेपाः कोरोनाया नितिं तयार जूगु हसना वंगु खः । तर लिपा सरकारं क्वारान्टाइन तय् मफइगु व थः हे स्व क्वारान्टाइन च्वनेमाःगु धाःसें लाचारी क्यन । थ्व हे लाचारीया लिच्वः आःया लकडाउन खः । विदेशं वःपिं छुं मनुतयेत क्वारान्टाइन तयेत कन्जुस्याँइ याना आः ३ करोड नेपामिया भविष्यय् ग्रहण लाःगु दु ।
विश्व महामारी जुइकथं बांलाःगु पला न्ह्याकाच्वंगु नेपाल सरकारया थूगु निर्णय गलत साबित जुल । विदेशं वःपिंत अनिवार्य स्वक्वारान्टाइन च्वनेमाःगु निर्णय याःसां इमिगु अनुगमन जुइ मफुत । थुकिया नितिं चीनं उद्धार याःगु थें जाःगु ब्यवस्था फुक्कसित याःगु जूसा थौं लकडाउन यायेमालिगु अवस्था सायद मवइगु खः । विदेशं वःगु भाइरसयात नेपाः दुकायेगु हे दकलय् तःधंगु कमजोरीया प्रदर्शन जूगु दु ।
थ्व दथुइ स्वास्थ्य मन्त्री न्ह्यचिला कोरोना भाइरसया थुम्ह ल्वगियात थःपिंसं अस्पतालय् यंकागु सगौरव रुपं न्ह्यथनादिल । छुं दिं न्ह्यः छेँ पाँहा वःगुलिं कोरोनाया विषयय् नवाय् मखु धाःम्ह वयेकलं पाहाँचह्रेया दिं हे कोरोना खनेदुम्ह मयेजु गःगु फयेखः (हवाइजहान)या फुक्क यात्रीयात माला क्वारान्टाइनय् तयेगु घोषणा यानादिल ।
छ्याता
फेसबुक छ्याता