संयोजक, साँस्कृतिक कवः
खोकना महोत्सव धका न्हापा छक नं जुइधुंकल । न्हापा स्वयां थुगुसि एकदम बांलाका यंकेत्यना । खोकनाय् जम्मा १२ बाजं खलः दु । न्हापा युवा पिढि भचा म्हो जुयाच्वंगु खःसा थुगुसि धासा युवा पिढिया सहभागिता उल्लेख्य दु । ६० निसें७० जना मुना नेवाः अर्केस्त्रा थाय् त्यनागु दु । थ्व उलेज्या जुइबलय् स्वये दइ । धिमे। धाः, खिँ, नायेखिँ, पोंगा गुलि नं बाजं दु दक्व थायेगु जुइ । व नापनापं सांगितिक प्रस्तुति बांलाकेत व मिठास बीत झीके मदुगु बाजं आधुनिक बाजंया तकं छ्यलाबुला यायेत्यनागु दु ।
कन्सर्ट धाये साथ नां चले जूपिं कलाकार माः धैगु धारणा दु । विदेशी कलाकार हयेमाःगु धैथें नं जुयाच्वंगु दु । तर झीसँ थुगु महोत्सवं थज्यागु धारण यात मखु सावित याये त्यनागु दु । खोकनाय् च्वंपिं कलाकार सलंस हे दु । वयेकःपिंत ह्वःता बीगु कथं थ्व महोत्सव जुइत्यंगु खः । खोकनाया कलाकार पाखें हे स्वन्हुयंकं ज्याझ्वः यायेत गाः ।
झीगु नेवाः संगीत मेगु संगीत स्वयां यक्व हे उत्कृष्ट जू । थ्व संगीत भारतया दक्षिण भेग लिसे भचाभचा ज्वःला । तर तुलनात्मक रुपं झीगु हे उत्कृष्ट खनेदु । स्वनिगलय् नेवाः कलाकार यक्व हे दु । यदि इपिं छथाय् जक च्वनेगु खःसा संसारय् मदुगु संगीत पिहाँ वइ ।
झीके स्वंगु प्यंगु ब्याण्ड तकं दु । थुगुसिया कुतः कथं पिनेया कलाकार स्वयां खोनाया हे कलाकारया सांगीतिक प्रस्तुति न्ह्यब्वयेगु जुइ । स्वन्हुयंकं हे कन्सर्ट यायेत्यना । दकलय् न्हापा त्वाः त्वाःया दाफा भजन न्यंकेगु जुइ । वयाँलिपा प्याखँ व म्ये हालेगु ज्याझ्वः तयेगु जुइ । वयाँलिपा स्वन्हुया नितिं स्वंगुु ब्याण्डया सांगितिक प्रस्तुति जुइ ।
उद्घाटन व समापन ज्याझ्वलय् नेवाः अर्केस्त्रा क्यनेगु जुइ सा व नापनापं झीथाय् लाखे थःगु हे कथंयागु दु । लाखे प्याखँ नं झीसँ तयागु दु । अथेहे झीथाय् पञ्चैबाजा धका नं बांलागु हे प्रस्तुति दु । नापं त्वाःत्वालय् महोत्सव जूगु इलय् भजन हालेगु ज्या नं जुइ । दाफा थायेगु ज्या नं त्वालय् यायेत्यनागु दु ।
छ्याता
फेसबुक छ्याता