चालकया लापरबाहीया हुनिं सिन्धुपाल्चोकया सुकुटेय् १७ म्हसिया ज्यान वंगु प्रहरीया प्रारम्भिक अनुसन्धानं क्यंगु दु ।
पक्का सतकय् घुम्ती व चिब्याःगु थासय् तकं तच्वकं ब्वाकुगुलिं बस दुर्घटना जूगु प्रहरीया क्वछिना खः । बिपरित दिशां वयाच्वंगु माेटरसाइकल छलय् यायेत स्वतले बस खुसिइ कुतुंवना १७म्ह स्यूगु खःसा ५०म्ह घापा जूगु दु ।
गम्भिर घापा जूम्ह चालकया धासा उद्दार याःगु दु । न्हापां स्वास्थ्य उपचार महत्वपूर्ण जूगुलिं बयान मकायागु जिल्ला प्रहरी ज्याकु, सिन्धुपाल्चोकया छम्ह अधिकृतं न्ह्यथंगु दु ।
सिन्धुपाल्चोकया प्रमुख जिल्ला अधिकारी गोमादेवी चेम्जोङया कथं १५ म्ह घटनास्थलय् मदुगु खःसा निम्ह उपचारया झ्वलय् मदुगु खः ।
सीपिं दोलखाया २४ दँया रञ्जिता केसी, सिन्धुपाल्चोकया २७ दँ दुम्ह चमेली श्रेष्ठ, वयेकया म्हाय् ६ दँया शाहीरामी श्रेष्ठ, ३ लाया मचा सिसन तामाङ, दोलखाया ४५दँ दुम्ह रत्नकुमारी रावत, वयेकया काय् २९ दँ या किरण राउत, २० दँया कविता राउत, खुदँया सलिना तामांग, ५२ दँ दुम्ह चेतकुमारी बस्नेत, खुदँया साया श्रेष्ठ, १४ दँया निखिल खड्का, १४ दँया दिल लामा, ३२ दँया निर्मला खड्का, न्यादँया सलिना तामांग व ७० दँया उरमाया तामांगया सनाखत जूगु दु ।
दोलखाया सैलुङ गाउँपालिका मागा देउरालीं यें वयाच्वंगु बा २ ख ७२४५ नम्बरया बस आइतबार न्हिनय् सुनकोशी नदीइ कुतुंवंगु खः ।
घटना धुंका नेपाल प्रहरी, सशस्त्र प्रहरी बल व नेपाली सेनाया पुचलं उद्दार याःगु खः ।
बस सतकं ३५ मिटर क्वये कुतुंवंगु खः ।
गुदँ न्ह्यः नं थथे हे
गुदँ न्ह्यः थुगु हे इलय् थुगु हे थासय् जलविरें यें वयाच्वंगु बस दुर्घटना जुया २६म्ह यात्रु मदुगु खः । २५ भदाै २०६७य् उगु हे थासय् बस दुर्घटना जुया उबलय् यक्ह हे बेपत्ता जूगु खः ।
छ्याता
फेसबुक छ्याता