वंगु मंगलबाः सिन्धुपाल्चोकय् अजू चायापूगु खँ जुल । सिन्धुपाल्चोकया चौतारा साँगाचोकगढी नगरपालिका १३ या छगु पुखुलिइ २५म्ह माक तिन्हुल । वयाँलिपा थप ५० म्ह माक तिन्हुइगु तरखर यानाच्वन । स्थानिय तयेसं माकतयेत बिस्काछ्वल । ९ म्ह म्वाकं उद्दार यात तर १६ म्ह माक दुबेजुया सित ।
माकत लाल काय् सःपिं खः । लाल काय् सःसां थुकथं माक दुबेजुया स्यूगु खना स्थानियतयेसं माकया सामुहिक आत्महत्या कथं शंका याःगु दु । तर विज्ञतयेगु धापु धासा पाः, थ्व आत्महत्या मखु । माकत लाल कायेसःसेंलि दुबे जुइमखु । पुखुलिइ दूषित पदार्थ वा विष दुगुलिं इपिं स्यूगु अनुमान विज्ञतयेगु दु । थ्व विषयलय् अनुसन्धान यायेमाःगु इमिगु धापु दु ।
१० दँ न्ह्यः नं सामुहिक माक हताहत
१० दँ न्ह्यः पशुपतिइ २०म्ह निसें ३० म्ह माक सित । पशुपतिइ छगु मतया लठ्ठाय् माकयात करेन्टं ज्वन । हाहां उम्ह माक सित । मेपिं माकत सिम्ह माकयात सालेगु झ्वलय् करेन्टं कयाः पुकुपुकु सिनावन । २० म्ह निसें ३० म्ह माक करेन्टं सित ।
माक नं आत्महत्या याइला ?
वन्यजन्तुत आत्मविनाशकारी व्यवहार (सेल्फ डिस्ट्रक्टिभ बिहेभियर) दुपिं खः । जीवनया छगु इलय् देहत्याग यायेफु । झी थाय् थज्यागु घटना न्यनातयागु दुसां थुकिया गहन अध्ययन धासा जूगु मदु । वन्यजन्तुं आत्महत्या याइगु सम्बन्धय् संसारय् यक्व अनुसन्धान जूगु दु । इकोलोजिस्ट नापं त्रिवि केन्द्रीय वातावरण विज्ञान क्याम्पसया उपप्राध्यापक मनकुमार धमलाया कथं स्तनधारी जीवं सुंनं हिंस्रक वा थःस्वयां बल्लाम्ह जीवया न्ह्यः प्राण त्वते फु । डल्फिन, माक, किसि थें जाःपिं स्तनधारी जीव थःगु छेंजःया सुं दुजः सितकि शोकय् च्वनि । शोकय् दूगु इलय् न हे मनसे सीपिं यक्व जीव दु । थुपिं पुचःया सुं दुजः सितकि नापसं वनिगु, सालिगु वा सिम्ह ज्वना वनीगु याइ । थथे जीवतयेसं सामूहिक आत्महत्या हे याःगु घटना धासा दुर्लभ जूगु वयेकःया धापु दु । पुचःया सुंयात बचेयायेत स्वइबलय् ज्यान वनेफूगु वयेकया धापु दु ।
आत्ते जुया, न्यासि ववं, बिस्यू ववं वा भीर, सिमां आदि तजाःगु थासं कुतुंवना जीवत सीगु विज्ञतयेगु धापु दु ।
मनुथें मेपिं जीवं आत्महत्या याये मफइगु त्रिभुवन विश्वविद्यालय केन्द्रीय जीव विज्ञानका प्राध्यापक नापं माक विज्ञ मुकेश चालिसेया धापु दु । संसारय् बुद्धि दुपिं मनु जक खः । आर्थिक, सामाजिक, राजनीतिक नापं वंशानुगत कारणं मनुन आत्महत्या याइ । थज्यागु स्वभाव मनुयाके जक दु ।
स्रोत ः फेसबुक, कान्तिपुर
छ्याता
फेसबुक छ्याता