लानीपुखुया देग: शिखर शैलिइ देकीगु पक्का


रानीपुखु(लानीपुखु) वा न्हूपुखुया बालगोपालेश्वर देगः पुनर्निर्माण सम्बन्धय् राष्ट्रिय पुननिर्माण प्राधिकरण व निर्माण कम्पनी सीए तुलसी कन्ट्रक्सन जेभीदथुइ सम्झौता जूगु दु । मंगलबार यें ग्वसाग्वःगु छगु ज्याझ्वलय् सम्झौता पतिइ हस्ताक्षर जूगु खः । सम्झौतानापं आ देगः पुननिर्माणं गति कायेत्यंगु दु ।

बालगोपालेश्वर देगः, देगःतक वनीगु ताँ व पुखु जलाखला क्यब पुननिर्माणया जिम्मा जेभीं काःगु दु । सम्झौतापतिइ प्राधिकरणया पाखें सहसचिव नापं सम्पदा संरक्षण, सार्वजनिक भवन व पूर्वाधार महाशाखा प्रमुख शिवहरि शर्मा व निर्माण कम्पनीया पाखें शान्तकुमार श्रेष्ठं हस्ताक्षर याःगु खः । प्राधिकरणया कथं पुननिर्माणया सम्झौता १४ करोड २७ द्व ५ स ५७ तकाय् जूगु दु ।

ज्याझ्वलय् राष्ट्रिय पुननिर्माण प्राधिकरणया प्रमुख कार्यकारी अधिकृत सुशील ज्ञवालीं बालगोपालेश्वर देगः पुनर्निर्माणया नितिं सम्झौता याःगु सुखद् पक्ष जूगु न्ह्यथनादिल । थूगु देगः प्रताप मल्लकालीन शिखर (ग्रन्थकुट) शैलीइ पुननिर्माण जुइत्यंगु दु । उपभोक्ता समितिपाखें लानीपुखुया पुननिर्माण जुयाच्वंगु न्ह्यथंसें वयेकलं बालगोपालेश्वर देगःया पुनर्निर्माण नं द्रुत गतिइ न्ह्याःवनाच्वंगु दु ।

राष्ट्रिय पुननिर्माण प्राधिकरणया कार्यकारी दुज डा. चन्दबहादुर श्रेष्ठं लानीपुखुया पुननिर्माण याना देगः पुननिर्माण याना असर मलाइगु कथं समन्वयात्मक ढंगं ज्या यायेत छ्याता बियादिल । सहसचिव नापं सम्पदा संरक्षण, सार्वजनिक भवन व पूर्वाधार महाशाखा प्रमुख शिवहरि शर्मां बियातःगु इ न्ह्यः हे निर्माण कम्पनीं देगः पुननिर्माण ज्या क्वचायेकीगु विश्वास व्यक्त यानादिल ।

निर्माण व्यवसायी शान्तकुमार श्रेष्ठं प्राधिकरण, उपभोक्ता समितिनाप सहकार्य व समन्वय याना सम्पदाया मौलिकतायात विशेष ध्यान बिया बालगोपालेश्वर देगः, ताँ व क्यब पुननिर्माण यायेगु प्रतिबद्धता प्वंकुगु दु । आः लानीपुखु उपभोक्ता समितिपाखें पुखु व जलाखला लागाया पःखा तयेगु ज्या जुयाच्वंगु दु ।
Share on Google Plus

News: Newa News

    छ्याता
    फेसबुक छ्याता