वरिष्ठ संगीतकःमि स्वयम्भूराज शाक्यया एकल सांगीतिक न्ह्यब्वया “जुजु वेयर्स ओ प्रिय लिफः स्वयाः” सांगीतिक सनिल वइगु शनिवा जुइगु जूगु दु । मंगल इन्टरटेनमेन्टया ग्वसालय् थुगु ज्याझ्वः वरिष्ठ संगीतकःमि शाक्य जन्म जूगु हःखा त्वाः कोतय् जुइ । सनिलया ५ ताः इलय् न्ह्याइगु थुगु ज्याझ्वः निघौया सांगीतिक यात्रा खःसा थुकी म्येहालामि शाक्ययात संगीता शाक्य, नीशा देसार, सुमन कपाली, अनु शाक्य, प्रियंका शाक्य व चन्द्रमान शाक्यं साथ बियादी । ज्याझ्वलय् लोकंह्वाःम्ह भूपेन्द्र बज्राचार्यया संयोजनय् ८ म्ह वाद्यवादक संगीतकारपिन्सं बाजं थानादी ।
थुगु ज्याझ्वः म्ये रेकर्डिङ सुविधा सहज मजूबलय् छकू कोठाय् वाद्यवादकपिंनाप म्येहालामि अले मेगु कोठाय् प्राविधिक च्वनाः रेकर्ड जूगु म्ये “ओ प्रिय लिफः स्वया”या नामं थुगु ज्याझ्वः न्ह्याइ । म्येहालामि स्वयम्भूराज शाक्यनापं सपनाश्रीया सः दुथ्याःगु, विरेन शाक्य व शान्त शाक्य च्वयादीगु अले विरेन शाक्यं लसय् हनादीगु खः ।
थुगु ज्याझ्वलय् मविवि शाह, दिनेश अधिकारी, वंशीधर बज्राचार्य, प्रकाश साय्मि, शाक्य सुरेन, चन्द्रमान शाक्य, तीर्थ माली, शान्त शाक्य, हेमन्त विवशया रचना थ्वइसा संगीतकःमि शाक्यनापं नातिकाजी, तीर्थ माली, मनराजा नकर्मी, नरेन्द्र प्यासी, चन्द्रमान शाक्य, विरेन शाक्य, चन्द्रराज शर्मां लसय् हनादीगु म्ये थ्वइ ।
थुगु ग्वसालय् मू प्रायोजक जुजु वेयर्स, सह–प्रायोजक सम्झना लेब्ररेटोरी क्लिनिक प्रा.लि., हौगः, यल व होटल सारा श्री प्रा.लि, लुम्बिनी खः । २४ क्यरेट, मानभवन, जावलाखेल, यलया ग्वाहालिइ न्ह्याइगु थुगु ज्याझ्वः सुरजवीर बज्राचार्यं न्ह्याकादी ।
रेडियो नेपालया विशिष्ट श्रेणीया म्येहालामि शाक्य थीथी सिरापा अले सम्मानं सम्मानित जुयादीगु दु नापं तिब्बत, श्रीलंका, बंगलादेश, साउदी अरेबिया, जापान, हङकङ, बैंङ्ककय् नेपाःया सांगीतिक पहिचान न्ह्यब्वयादीधुंकूगु दु । ५ गू सोलो म्येचाःनापं २५० पु सिबें अप्वः म्ये सृजना-हालादीधुंकूम्ह वरिष्ठ संगीतकःमि शाक्यया ३ गू एकल सांगीतिक प्रस्तुतिया ज्याझ्वः नं जुइधुंकूगु दु । उगु स्वंगुलिं ज्याझ्वः टिकट शो खःसा थुगु ज्याझ्वः सकसिया नितिं प्रवेश निःशुल्क खः ।
बुखँ : सुरज बीर बज्राचार्य
0 Comments:
Post a Comment