नेवाः आइडल घोषणा


साँगितिक माहौल क्वाकेत आइडलया बांलागु प्रभाव खनेदु । अमेरिकन आइडल धुंका इडियन आइडलं गूगु लोकप्रियता काल व थौंकन्हे नेपाल आइडलं कयाच्वंगु दु । थ्व झ्वलय् आः नेवाः आइडल वयेत्यंगु दु । अमेरिकन आइडलया फ्यान्जाइज मखुसां थुगु नेवाः आइडल नेवाः भाषा व संगीत थकायेत अभुतपुर्व ह्वताः जुइगु आयोजक मध्येया मनोज नेवाः खड्गीं न्ह्यथनादिल । ईमेज च्यानलय् प्रशारण जुइगु थुगु नेवाः आइडलया ३३ ब्वः दइगु घोषणा जूगु दु ।

लहना मिडिया प्रा.लिया मिडिया संयोजन व बेलटेक प्रा.लिया अनलाइन ग्वाहालिइ न्ह्याइगु थुगु नेवाः आइडल मनोज नेवाः खड्गी नापं अञ्जिता खड्गी व राजु स्यस्य जाना ग्वसाग्वय् त्यंगु दु ।

गाडि नापं नगद पुरस्कार नेवाः आइडलयात बीगु ग्वसा दुगु व ल्यू व लियांल्यू यात मोटरसाइकल व नगद पुरस्कारया व्यवस्था जुइगु पत्रकार सम्मेलन याना न्ह्यथंगु दु । निर्णायक सु जुइले धका न्यंगु न्ह्यसःया लिसलय् जजया निर्णय मजूसां न्ह्यू बज्राचार्य, दिपक बज्राचार्य, योगेश्वर अमात्य नापं पवित्र कसाःयात कायेगु व नापं मिसाम्ह निर्णायक तयेगु बिचा दुगु खँ आयोजकं न्ह्यथंगु दु । निर्णायकया बारे छवा दुने निर्णय जुइगु खड्गीं न्ह्यथनादिल ।

३ करोड ३२ लाखया अनुमानित खर्च नापं ज्याझ्वःया तयारी जुयाच्वंगु ग्वसाखलकं न्ह्यथंगु दु । देन्यंकया नेवाः तयेत ब्वति कायेकेगु ग्वसा दुगु थुगु नेवाः आइडलय् गैर नेवाः तयेसं ब्वति कासां नेपालभाषां म्ये हालेमाःगु व मेमेगु भाषां म्ये हासां निर्णयार्थ धासा नेपालभाषा हे माःगु न्ह्यथंगु दु ।

Share on Google Plus

News: Newa News

    छ्याता
    फेसबुक छ्याता

0 comments:

Post a Comment