सत्यमोहन जोशी व धर्मादित्य धर्माचार्ययात पाठ्यक्रमय् दुथ्याकेगु उद्घोष यल महानगरपालिकाया मेयर चिरिबाबु महर्जनं यानादीगु दु । आः वइगु शैक्षिक सत्रय् वयेकपिं पाठ्यक्रमय् दुथ्याइगु मेयर महर्जनं न्ह्यथनादिल । मातृभाषा पत्रकारीता दिवस हनेगु झ्वलय् वय्कलं आः वइगु शैक्षिक सत्रय् नेपालभाषाया स्कूल चाय्केगु प्रतिवद्धता तकं प्वंकादिल । स्थानिय सरकारयात बन्धनय् तय्त सरकार प्रेरित जुगु तकं मेयर महर्जनं द्वपं बियादिल । संविधान प्रदत्त अनुशुचि ८या शिक्षा अधिकार लाकाकाय् त्यंगु न्ह्यथंसें मेयर महर्जनं सकलसित सचेत जुइत इनाप यानादिल ।
 |
| खवय् धर्मादित्य धर्माचार्यया झ्वाता जवय् पण्डित हेमराज शाक्यया झ्वाता |
नेवाः पत्रकार राष्ट्रिय दबू व मां भाय् पुचःया मंकाः ग्वसालय् प्यक्वःगु मातृभाषा पत्रकारीता दिवस हंगु खः । धर्मादित्य धर्माचार्यया बुदिं नापं वयेकलं पिथनादीगु मातृभाषा नेपालभाषाया न्हापांगु पत्रिका बुद्ध धर्मया लुमन्ती कथं थौंयागु दिंयात मातृभाषा पत्रकारीता दिवस कथं दबुया पहलय् हनावयाच्वंगु दु । यलया पूच्वःय् धर्मादित्य धर्माचार्यया झ्वाताय् स्वांमा देछाना दिवस हंगु खः । मूपाँहा कथं ज्याझ्वलय् मेयर महर्जन झायादीगु खः ।
मांभाय् पुचःया नायः हेरारत्न शाक्य, नेपाल पत्रकार महासंघया उपाध्यक्ष दिलिप थापामगर, आदिवासी जनजाति पत्रकार महासंघया नायः डण्ड गुरूङ, मधेसी पत्रकार समाजया नायः मोहन सिँह, धर्मादित्य धर्माचार्यया भौ बेखालक्ष्मी नेवाः पाहाँकथं झाःगु ज्याझ्वलय् दबुया नायः श्रीकृष्ण महर्जन सभानायः जुयादीगु खः । महर्जनं धर्मादित्य धर्माचार्य नेपाःया न्हापाम्ह मातृभाषा पत्रकार धका न्ह्यथनादिल ।
मातृभाषा पत्रकारिता दिवस नेवाः पत्रकार राष्ट्रिय दबु बिधिवत रुपं गठन जुइधुंका धर्मादित्य धर्माचार्य नेपालभाषाया न्हापाम्ह पत्रकार जक मखु मातृभाषा पत्रकारिताय् न्हापाम्ह पत्रकार धका लुमंका बुँदिं हनेगु ज्या न्ह्याकुगु खः । स्थापनाया मेगु दँय् दबुलिं मातृभाषा पत्रकारिताया न्हापाम्ह व्यक्ति जुइमा धका अनुमान नापं आदिवासी जनजाती सकललिसे सहलह ब्याका मातृभाषा पत्रकारिता कथं हनेगु शुरु याःगु खः । न्हापांगु दँ
धर्मादित्य धर्माचार्य पत्रकारिता दिवस कथं न्ह्याःगु खःसा मेगु दँ निसें मातृभाषा पत्रकारिता दिवस धका हनेगु शुरु जुगु खः सा थुगुसि प्यदँ क्वचाःगु जुल । नेपाःया इतिहासय् न्हापाम्ह नेपालभाषाया पत्रकार धर्मादित्य थौं सिबें ९० दँ न्ह्यः हे नेपालभाषां पत्रकारिता न्ह्याकादिगु खः । थुकिया पुष्टि मातृभाषा पत्रकारिता सम्मेलनं यायेधुंकुगु महर्जनं न्ह्यथनादिल ।
अथेहे माँभाय् पुचया नायः हेरारत्न शाक्यं धर्मादित्य धर्माचार्य लुमंकेगु धैगु नेवाः तय्गु जक मखु सकल आदिवासी, जनजातितय्गु नितिं जुगु न्ह्यथनादिल । धर्मादित्यया ११८ दँ बुदिंया लसताय् ब्यागलं ब्यागलं हनावयाच्वंगु बुदिं व दिवसयात माँ भाय् पुचः व नेवाः पत्रकार राष्ट्रिय दबु नापं हनागु न्ह्यथनादिल । धर्मादित्यं उबलय्या मातृभाषा प्रकाशन प्रतिबन्ध यानातःगु अवस्थाय् नं भाषा चेतना व राष्ट्रिय चेतना अधिबृद्धिया नितिं नेपालभाषां बुद्ध धर्म नांया पत्रिका कलकत्ता वना प्रकाशन यानादीगु न्ह्यथनादिल । वयेकःया देनयात च्वछाया जक मगाःगु बरु उगु लँपु ज्वना न्ह्यःने वंसा जक वयेकयात धाथें लुमंकेगु जुइ धका शाक्यं न्ह्यथनादिल ।
दबुया न्वकू सुरजवीर बज्राचार्यं व दबूया यल कचा छ्याञ्जे राजेश बज्राचार्यं लसकुस व सुभाय् देछाःगु खःसा दबुया मूछ्याञ्जे सुनिल महर्जनं न्ह्याकुगु ज्याझ्वलय् नेपालभाषा पत्रकार नाप भाषासेवीतयेगु बांलांगु हे सहभागिता दुगु खः ।
0 Comments:
Post a Comment