निसः व स्वीच्याम्ह ज्याथजिथि हन


यल महानगरपालिका वडा नं १६ या ग्वसालय् शुक्रबाः वडाया निसः व स्वीच्याम्ह ज्याथजिथि नागरिकया हनाज्याझ्वः जूगु दु ।

यल पाटनढोकाय् ग्वसाग्वःगु ज्याझ्वलय् ‘ज्येष्ठ नागरिकया सम्मान, सभ्य समाजया स्वाभिमान’ नारा नापं हनेज्या याःगु खः ।


७७ दँय् ज्याजंकु, २ दँय् निक्वःगु जंकु व ८ दँय् स्वक्वःगु जंकु क्वचापिं ज्याथजिथियात हंगु ज्याझ्वःया कजि वडा दुजः पञ्चबज्र बज्राचार्य जुयादीगु खः ।

यल महानगरपालिकाया मेयर चिरिबाबु महर्जनं स्वाँमा, महानगरपालिका वडा नं १६ या वडाअध्यक्ष निर्मलरत्न शाक्यं दोसल्ला न्ययेका ज्याथजिथियात हंगु खः ।

ज्याथ पाखें ९८ दँ दुम्ह गणेश बहादुर शाक्य, तुलसी बहादुर श्रेष्ठ, व ज्याथिपाखें सछि दँ दुम्ह तुलसी माया श्रेष्ठयात हंगु खः । अथेहे निक्व जंकु क्वचाम्ह यल महानगरपालिकाया पुलाम्ह प्रमुख नापं पूर्वमन्त्री बुद्धिराज बज्राचार्ययात नं हंगु खः ।


ज्याथजिथिया नितिं ज्ञानमाला भजन, धार्मिक पाठ, प्रवचन नापं अभिमुखीकरण ज्याझ्वः ग्वसाग्वःगु खः । उगु इलय् भिक्षु कौण्डन्यं शील सदाचार बियादीगु खः ।


अखिल नेपाल भिक्षु महासंघया महासचिव भिक्षुं थःके दुगुलि सुखि जुइगु, जीवनयात अहोभावं स्वयेगु व फुक्क खँया आसक्तिं जुइगु दुःखया बोध याना ध्यान व ज्ञानया अभ्यास यायेत न्ह्यथनादिल ।

लोकंह्वाम्ह म्ये हालामी स्वयम्भुराज शाक्यं बुद्ध भजन, भाष्कर वर्ण महिला समूहं ज्ञानमाला भजन न्ह्यब्वःगु खः । ज्याथाजिथिपिनि ताःआयू, उसाँय, सुख, शान्ति व मंगल कामना यासें नेपाल परम्परागत बौद्ध धर्म संघया पाखें अपरमिता धारणी, भैषज्य धारणी, स्वस्ती वाचन व मंगलास्त्रोत पाठ याःगु खः ।



समारोहलय् प्रा. बज्रराज शाक्यं ज्याथजिथिपिंत उत्प्रेरित यासें स्वस्थ, निरोगी जुया सकारात्मक बिचा नापं सक्रिय जीवन म्वायेमाःगु न्ह्यथनादिल ।

वडा १६ या वडाअध्यक्ष निर्मलरत्न शाक्यं ज्याथजिथिया ज्ञान, सीपयात कदर याना वनेगु नीति कथं वैगु दँय् परम्परागत बाजं गुरुपिंत हनेगु न्ह्यथनादिल ।

उगु वडां वंगु चैत्र १३ निसें २७ गतेतक कला व संस्कृति महोत्सव याना वडाया ज्याथजिथि हस्तकला व्यवसायपिंत हंगु खः ।







Share on Google Plus

News: Newa News

    छ्याता
    फेसबुक छ्याता