कला व सांस्कृतिक महोत्सव थौं चैत्र १३ गते निसें शुरु जुइत्यंगु दु । वल्ड क्राफ्ट काउन्सिलं यलयात ३५ क्वगु हस्तकला नगरी घोषणा याःगु लसताय् यल महानगरपालिका– १६ पाखें बृहत कला व सांस्कृतिक महोत्सव ग्वसाग्वय्त्यंगु दु । महोत्सव चैत्र १७ गतेतक न्ह्याइ ।
यलया लाय्कू लागां छगु समारोहया दथुइ न्हीने १ ता इले महोत्सवया उलेज्या उपपराष्ट्रपति नन्दबहादुर पुनं याय्त्यंगु दु । हस्तकला नगरीया उत्सव, कला संस्कृतिया महोत्सव धइगु मू नारा नापं महोत्सव न्यान्हू न्यायेकेत्यंगु खः । महोत्सवया प्रर्वद्धकय् नेपाल हस्तकला महासंघ, ललितपुर हस्तकला संघ, ललितपुर उद्योग वाणिज्य च्वनाच्वंगु दु । १६ वडा दुनेया त्वाःयात महोत्सवया सह आयोजक तयातःगु दु ।
महोत्सवय् फुक्कसिया ब्वति व अपनत्व दय्केत सरोकारवालानाप सहलह यानागु व प्रचारात्मक ज्या न्ह्याकाच्वनागु महोत्सवका मूल समारोह समितिका संयोजक नापं वडाअध्यक्ष निर्मलरत्न शाक्य प्रेस सम्मेलन याना न्ह्यथनादिल । महोत्सवया तयारीया लागि वडां हस्तकला व्यवसायी, निजी क्षेत्र, सहकारीकर्मी, मिसा पुचः, पर्यटक व्यवसायी, जातीय समाजया प्रतिनिधि, त्वाः सुधार समिति, थीथी वडाया जनप्रतिनिधिनाप सहलह याःगु महोत्सवया कजि शाक्यं न्ह्यथनादिल । सहकारीकर्मी, पर्यटन व्यवसायी व हस्तकला व्यवसायी नापंया सरोकारवालां महोत्सवय् यलया हस्तकला ,संस्कृति संरक्षणया लँपुइ वनेत, क्राफट सिटी बारे नगरवासीयात सुसूचित यायेत ताःलाइगु बिचाः न्ह्यब्वयादिल । क्राफ्ट सिटीया घोषणां ललितकलाय् नांजागु यल देया विकासय् ज्वमदुगु माध्यम जुइगु पर्यटक व्यवसायी किरणमान प्रधानं न्ह्यथनादिल ।
नागबहाल टोल सुधार समितिया सहआयोजना व वसुवर्ण बचत तथा ऋण सहकारी संस्थाया व्यवस्थापनय् नागबहालय् धातुकला, मूर्तिकलाया मुक्कं २५ गु स्टल तय्त्यंगु दु ।
नेवाः खाजा व मेमेगु खाद्य परिकार याना न्यागु स्टल तय्त्यंगु दु । अथेहे इलाननीइ कलाकारतय्सं धातुया मूर्तिइ बुट्टा कियाः जीवन्त प्रदर्शनी याय्त्यंगु दु ।
अथेहे नकबहीलया लोकाकिर्ति महाविहारय् रञ्जना लिपि च्वय्ज्या विधिबारे प्रदर्शनी जुइ ।
नकबहील टोल सुधार समितिया सहग्वसालय् उगु बहीलय् महोत्सव ईतक थीथी बूबःया मण्डः ब्वय्त्यंगु दु । सकिमना पून्हिया दिं ब्वइगु हलिमलि नं थन ब्वय्त्यंगु दु ।
अथेहे दँय्दसं मोहनी कुन्हु क्यनिगु अष्टमातृका प्याखँया झाँकि क्यनेत्यंगु दु ।
महाविहारनापंया नकबहीलय् सांस्कृतिक प्रदर्शनी जुइत्यंगु दु । नकबहीया फल्चाय् मच्छिन्द्रनाथ दय्किगु विधि जीवन्त प्रदर्शनी जुइ ।
अथेहे भाष्करदेव संस्कारित लोकाकिर्ति महाविहार न्याखाचुकय् बज्राचार्य पुजाविधि कथं बुसांनिसें मसीतलेया दशकर्म संस्कार व थीथी पुजाविधिइ छ्यलिइगु सामग्रीया प्रदर्शनी जुइ ।
अथेहे स्वठ टोल सुधार समितिया सहग्वसालय् नेवाः परम्परागत भेषभुषा प्रदर्शनी, सांस्कृतिक नृत्य नाप सांगितिक ज्याझ्वः जुइ ।
धातुया मूर्तिकला, मूर्ति देकेगु प्रक्रियाया जीवन्त प्रदर्शनी जुइ । अथेहे स्थानीय टंग, तिच्छुगल्लीइ लीया थलबल व कायगुननीइ थीथी पर्वया बोध याकीगु सामग्रीया प्रदर्शनी जुइ ।
पिम्बहास्थित ऐतिहासिक जगमदु पुखुलिइ बोटिङ्ग, चिलच्वों स्तुपा नापसं राष्ट्रिय व अन्र्तराष्ट्रिय लागाय् विशिष्ट योगदान याःगु नेवाः समुदायया व्यक्तित्वया चित्र प्रदर्शनी याय्त्यंगु दु ।
महोत्सव अवधि दुने वडाया परम्परागत धिमे बाजं, धां बाजं, नाय्खीं बाजं, नौ बाजा मृडंङ्ग भजन, लाखे नाच नापं थीथी सांस्कृतिक झाँकीत क्यनेत्यंगु दु ।
अथेहे क्राफ्ट सिटी, संस्कृति संरक्षण, पर्यटक प्रर्वद्धन बारे अन्र्तक्रिया, डबली बहस जुइगु न्ह्यथंगु दु । न्हिथं थीथी स्थानीय ब्याण्डतय्गु सांस्कृतिक प्रस्तुती जुइत्यंगु दु ।
महोत्सवं वडा नं १६ यात सांस्कृतिक, हस्तकला व पर्यटकीय वडाया रुपय् विकास गर्न बः जुइगु वडाअध्यक्ष शाक्य न्ह्यथनादिल ।
विश्वसम्पदा धलखय् लाःगु कृष्ण देगः निसें हिरण्यवर्ण महाविहार (गोल्डेन टेम्पल), यशोधर महाविहार, रत्नाकर महाविहार नापंया लिच्छिवकालीन बौद्ध विहार, थीथी मूर्त, अमूर्त सम्पदा थुगु हे वडाय् लाःगु दु । कात्ति प्याखँ, अष्टमातृका प्याखँ थें मल्लकालीन प्याखँ थुगु वडां सञ्चालन जुयावयाच्वंगु दु । थुकियात हे ध्यानय् तयाः वडायात सांस्कृतिक, हस्तकलाया वडा कथं विकास याय्गु आज्जु कयागु वडाअध्यक्ष शाक्यं न्ह्यथनादिल । थुगु महोत्सव रणनितिक सुरुवात जूगु व थ्व महोत्सव धुंका नं थुगु लागायात कला व सँस्कृतिया थाय् दय्केगु ग्वसा दुगु वय्कलं बः बियादिल ।
नेपाल हस्तकला महासंघया नायः सुरेन्द्रभाई शाक्यं कला नगरी घोषणा जूगु इलय् यलया कला,संस्कृति व कालिगढतयेगु हितका नितिं थ्व प्रेरणा जुइगु विश्वास व्यक्त यानादिल । वय्कलं घोषणा कथं हस्तकलाया प्रर्वद्धनया नितिं ठोस ज्या याना क्यनेगु ई वःगु न्ह्यथनादिल ।
वल्ड क्राफ्ट काउन्सिल एसिया प्यासिफिकया न्वकू नापं महासंघया पूर्वअध्यक्ष धर्मराज शाक्यं घोषणालिपा यल दुने दुगु ऐतिहासिक सम्पदा मूकथं देगः, स्तुप, चैत्य विहार नापं सत्तलया संरक्षण व सम्र्वद्धन याय्माःगु बाध्यात्मक अवस्था वःगु न्ह्यथनादिल । महानगरपालिका दुने उत्पादन जूगु हस्तकलाया वस्तुया गुणस्तरीयता कायम यायेगु, कालिगढपिनिगु नितिं तालिम वा प्रशिक्षण केन्द्र, बजार प्रर्वद्धन नापं गतिविधि याये फइगु अवसर दुगुलिं ठोस योजना माःगु न्ह्यथनादिल ।
0 Comments:
Post a Comment