न्हापा हे घाेषणा यानागु खुगु लख दां आःतक बीमफुगुलिइ अजू चासें प्रधानमन्त्री केपी शर्मा ओली १५ न्हू दुने २१गु लख उपलब्ध यायेगु बचं बियादिल । ज्यापु संस्कृति विकास कोषया ग्वःसा व धर्मचक्र तःननी त्वाःया संयोजनय् वंगु शनिबाः ने.सं. ११३९ थिंलाथ्व योःमरि पून्हीकुन्हु तःजिक क्वचागु १५क्वःगु राष्ट्रिय ज्यापु दिवसया मू पाँहाकथं झाम्ह ओली धर्म सँस्कृति स्वयेत हे नेपाः चाहिलेत पर्यटकत वयाच्वंगु व थुकियात नेवाःतयेसं जिवन्त तयाच्वंगु न्ह्यथनादिल । वयेकलं पर्यटकतयेत नेपाः दुहाँ वयेखतं थनया सँस्कृति व भेषभुषा क्यने कथं येंया अन्तराष्ट्रिय विमानस्थलयात बुटिक बिमानस्थल कथं देकेगु न्ह्यथनादिल ।
विशेष पाहाँ मेयर विद्या सुन्दर शाक्यं यें महानगर घाेषणा जुगु दिं व २४ क्वगु महानगर दिवसय् ज्यापू समुदायया विशेष ग्वाहालि दुगु लुमंकादिल । उगु दिवसय् सकल समुदायया १२५ गुरुतय्त सम्मान यागु खः । सँस्कृति संरक्षणया नितिं महानगरपालिकां यायेमागु ज्या यानायंकेगु व न्हापा स्वयाँ अप्व ग्वाहालि यायेगु मेयर शाक्य न्ह्यथनादिल ।
ज्यापु संस्कृति विकास कोषया नायः मंगलकृष्ण सिंहया सभानायसुइ जुगु ज्याझ्वलय् धर्मचक्र तःननि खलःया नायः तीर्थ नारायण महर्जनं लसकुस याःगु खः ।ज्याझ्वलय् ज्यापु दिवसया लसताय् काेषया न्वकू सन्तकुमार महर्जनया संयाेजनय् पिदंगु स्मारिका मूपाहाँ पाखें पितब्यूगु खःसा थीथी व्यक्तित्वपिंत हंगु खः ।
सम्मानित जूपिं बाल प्रतिभा सिजल महर्जन, युवा प्रतिभा डा. सगुन डंगोल (शिक्षा), सब्बारानी महर्जन व आशिष महर्जन (कासा), रमेश महर्जन (सांस्कृतिक), आशाकाजी महर्जन, देवेन्द्रमान महर्जन (पत्रकारीता), ईनिमा महर्जन (कला), रविना महर्जन (ज्यापु सरस्वती पदक), अशोकमान महर्जन (ज्यापु उद्यमी पदक), सूर्यलाल प्रजापति (श्री चक्रमान डंगोल समाजसेवा पुरस्कार), प्रा. धर्मराज डंगोल (ज्यापु रत्न), डा. ओमकारेश्वर श्रेष्ठ (ज्यापु प्रज्ञा), कल्पना महर्जन, सरिता महर्जन, कुलमान घिसिङ, दिपक कपाली, चिन बज्राचार्य, सानु मैया महर्जन, आर.एन. नकर्मी, मोहनश्याम खोकना महर्जन व संजीता राव (ज्यापु विशेष सम्मान), जयन्तीपुर बाँसरी खलः– फुुतुङ, नगां दाफा खलः–नगां, झ्वःत्वाः धिमय् खलः–सिंर, धाःबाजं मंका खलः–वादे व कुमाःलाछि बाँसरी खलः–नगदे (संस्थागत विशेष सम्मान) , नवौं राष्ट्रिय ज्यापु दिवस समारोह समिति २०६९ या संयोजक कालु महर्जन, त्वाः नायः, भलननी (ज्यापु साँस्कृतिक धरोहर सम्मान), १४क्वःगु राष्ट्रिय ज्यापुदिवस समारोह समिति २०७४ या संयोजक न्हुच्छे नारायण महर्जन, नःबहाः (संयोजक कार्य सम्पादन प्रशंसा–पत्र), स्व. प्रा. डा. परासर नारायण सुवा (ज्यापु मरणोपरान्त सम्मान) खः ।
धर्मचक्र तःननी त्वाःलं मेयर विद्यासुन्दर शाक्यं रिबन चाना थ्व न्ह्यः सांस्कृतिक जुलुस पिकागु खःसा जुलुस बसन्तपुलीइ थ्यंका सभाय् परिणत जुगु खः ।
वंगु १५ दँ न्ह्यः नारायण परिवार क्लब व तत्कालिन श्रीज्यापू महागुथि (एकिकरण लिपा ज्यापू महागुथि नेपाः) जाना याेमरी पुन्हि खुन्हु ज्यापू दिवस न्याय्केगु घाेषणा याःगु खः । उबलेया नारायण परिवार क्लबया नायः मदुम्ह चक्रमान डंगाेल व संरक्षक पुलाम्ह राज्यमन्त्री तीर्थराम डंगाेलया पहलय् हे ज्यापू दिवस व याेमरी पुन्हि कुन्हु सरकारी बिदा बीत ताःलागु क्लबया नायः प्रचण्डमान बज्राचार्यं न्ह्यथनादिल ।
0 Comments:
Post a Comment