बुद्धजयन्तीया लसताय् न्हापांगु खुसि जुइत्यंगु अन्तर्राष्ट्रिय बौद्ध सम्मेलनया तयारी लिपांगु चरणय् थ्यंगु दु । जेठ ६ व ७ गते अन्तर्राष्ट्रिय बौद्ध सम्मेलन येँँय् यायेत दछि न्ह्यः निसें तयारी न्ह्याःगु खः । सम्मेलनय् राष्ट्रिय व अन्तर्राष्ट्रियस्तरया बुद्धधर्म व बुद्ध दर्शनसम्बन्धी नेपाःया प्राज्ञिक व्यक्तित्व, अनुसन्धानकर्तायाा १८ गु व विदेशी ६ गु याना २४ गु ज्यापौ न्ह्यब्वइ ।
जेठ ८ गते २५६० क्वगु बुद्धजयन्ती लुम्बिनीइ न्यायेकेगु तयारी यागु दु । उगु इलय् बौद्ध सम्मेलनया नितिं देः विदेशं वइगु विशिष्ठ व्यक्ति व प्राज्ञया उपस्थितिइ लुम्बिनीइ बौद्ध परम्पराकथं थीथी धार्मिक अनुष्ठान नापं धुमधाम कथं बुद्धजयन्ती न्यायेकेगु तय जुगु दु ।
सिद्धार्थ गौतम बुद्ध सम्बन्धी भ्रम ज्यंकेत सम्मेलनया मू आज्जु जुइगु न्ह्यथंगु दु । उगु ज्याझ्वलय् दक्षिण कोरियां थःगु फुक्क सफुति गौतम बुद्ध भारतय् मजुसे नेपालय् बुगु धका भिंकेधुंकुगु न्हयथंगु खःसा मेमेगु देसंनं थःपिंसं द्वंगु भिंकेगु न्ह्यथंगु दु।
सम्मेलनया नितिं आःतक २१ गु देःया ९२ म्ह सरकारीस्तर व मेपिं प्रतिनिधिया ब्वति दइगु तय जुइधुंकुगु सम्मेलन मूल आयोजक समारोह समितिया सदस्यसचिव बच्चुनारायण श्रेष्ठं न्हयथना बियादिल ।
0 Comments:
Post a Comment