२४ घौ दुने २९०४ पिसिआर टेष्ट याना नकतिनि ६ म्ह न्हूपिं कोरोना संक्रमित पुष्टि जूगु स्वास्थ्य तथा जनसंख्या मन्त्रालयं न्ह्यथंगु दु । थ्व नापं संक्रमितया ल्याः ६८२ जूगु दु । थौं हे ७९ म्हेसिके पुष्टि जुइधुंकल ।
थौं सीम्ह ७० दँ दुम्ह ज्याथाया स्वाब जेठ ३ गते संकलन जूगु खःसा वयेकः जेठ ४ गते मदुगु खः । वयेकःया छेँजःया जेठ ५ गते हे स्वाब संकलन जूगु खःसा उकि ६ म्ह कोरोना संक्रमण पुष्टि जूगु खः ।
थौं पुष्टि जूपिं मध्ये येँ १५ वडाया २८ दँया मिजँ थौं कन्हे कलैया बाराय् कार्यरत जुयादि । अथेहे अछामय् ३२ दँया मिजँ, गुलरियाय् २२, २४ व १८ दँया मिजँ व पर्साया १८ दँ दुम्ह छम्ह संक्रमित पुष्टि जूगु खः ।
थौं हे २५ म्ह डिस्चार्ज जूगु दु । थ्व नापं ११२ म्ह कोरोना संक्रमित नेगेटिभ वया डिस्चार्ज जुइधुंकुगु दु । नारायणी अस्पतालं पर्साया १८ म्ह डिस्चार्ज जूगु दु । वयेकःपिं २१ अस्पतालय् च्वना वास याका डिस्चार्ज जूगु खः । अथेहे पाटन अस्पतालं येँ, धनुषा, धादिंग, दांग व बर्दियाया छम्ह छम्ह डिस्चार्ज जूगु दु । वयेकःपिं ९ न्हु निसें १० न्हु धुंका डिस्चार्ज जूगु खः । अथेहे टेकु अस्पतालं सर्लाहिया छम्ह न्यान्हु लिपा डिस्चार्ज जूगु दु । उकथं हे तौलिहवाया छम्ह नं डिस्चार्ज जूगु दु ।
म्हिगः निसें टियु टिचिंग अस्पतालय् नं पिसिआर परिक्षण ल्याब देकुगु दु । थ्व नापं आः परिक्षण प्रयोगशालाया ल्याः २० थ्यंगु दु ।
छ्याता
फेसबुक छ्याता