कोभिडं अमेरिकाय् थ्यंमथ्यं ३३ द्वःया मृत्यु, थूगु ला लकडाउन चीकेत ट्रम्पया निति


कोरोना भाइरस संक्रमणया हुनिं अमेरिकाय् २४ घौ दुने २१७४ म्ह सित । थ्व नापं अमेरिकाय् कोरोनां सीपिनि ल्याः ३२ द्व ८ स ६८ थ्यंगु दु । न्यूयोर्कय् जक ११ द्व ४ स ७७ म्हेसिया मृत्यु जूगु दु ।

जोन हप्किन्स विश्वविद्यालयया तथ्यांककथं अमेरिकाय् कोरोना संक्रमितया ल्याः ६ लख ६७ द्व २ स २५ थ्यंगु दु ।
थ्व दथुइ अमेरिकी राष्ट्रपति डोनाल्ड ट्रम्पं धाःसा वैगु ला अमेरिकाय् लकडाउन चीकेगु न्हूगु रणनीति सार्वजनिक याःगु दु ।

राज्यया गभर्नरपिंत छगु निर्देशिका जारी यासें ट्रम्पं स्वंगु चरणय् लकडाउन चायेकेगु रणनीति न्ह्यःने हःगु दु । राष्ट्रपति ट्रम्पं छुं राज्यय् थूगु ला दुने हे लकडाउन चीके फइगु न्ह्इथनादिल ।
‘अमेरिका खुला जुइ चाहेजु व अमेरिकन खुला जुइ चाहे जुयाच्वन, दे बन्द यायेगु ताः ईया समाधान मखु ।’ ट्रम्पं न्ह्यथनादिल ।

थूगु लाया लिपांगु ई तक अमेरिकाय् बेरोजगारीया दर २० प्रतिशततक थ्यनिगु अनुमान यानातःगु दु । लकडाउनं लागूऔषध दुव्र्यसनी, अयेलाया अप्व छ्यलाबुला, नुगःचुया ल्वगि व मेपिं शारीरिक व मानसिक समस्या अप्वयाच्वंगु न्ह्यथंगु दु ।

स्वस्थ नागरिकं निश्चित नियम पालना याना ज्याय् लिहाँ वनेमाःगु प्रस्ताव याःगु दु । स्वस्थ मनुखँ सामाजिक दूरी कायम याना ज्याय् वनेगु व अस्वस्थ जूसा छेँ हे च्वनेगु ट्रम्पया रणनीति दु ।

उखे गभर्नरतयेसं लकडाउन मचायेकेगु न्ह्यथंगु दु । ट्रम्प राष्ट्रपति जक खः जुजु थें वैगु फुक्क उजं पालना यायेम्वाःगु न्यूयोर्कया गभर्नर एंड्रयू कुओमों न्ह्यथनादिगु दु ।

Share on Google Plus

News: Newa News

    छ्याता
    फेसबुक छ्याता