नेसं ११४५ चिल्लागा २, बोडे । नेवाः देय् दबू स्वनिगः प्रदेशया अधिवेशन क्वचाःगु दु । म्हिगः जूगु अधिवेशनया वन्द सत्रं नविन थेच्वमि नायः पदय् सर्वसम्मतं त्याःगु दुसा ३३ म्ह जः दूगु कार्य समिति तकं सर्वसम्मतं ल्यःगु दु । अधिवेशनं गणेशराम श्रेष्ठ वरिष्ठ न्वकू, गंगादेवी महर्जन मिसा न्वकू, सुमन श्रेष्ठ न्वकू, शोभा बज्राचार्य महर्जन मू छ्याञ्जे अथेहे मनरा प्रजापति छ्याञ्जे पदय् ल्यःगु दु ।

नेपाल आयल निगमं पेट्रोलया भाः प्रतिलिटर ५ तका व डिजेल व मचिकंया भाः ४ तका क्वकाःगु दु । थाैं निसें लागू जुइ कथं निगमं इन्धनया भाः समायोजन याःगु खः ।

स्वनिगलय् आः पेट्रोल प्रतिलिटर १६३ व डिजेल व मचिकं १५१ तका दामं मीगु व वितरण जुइगु जूगु दु । निगमया प्रवक्तां भारतीय आयल निगमपाखें चैत १५ गते प्राप्त जूगु पेट्रोल व डिजेलया न्हूगु भाः कथं निगमया संचालक समितिया निर्णय कथं भाः समायोजन याःगु जानकारी ब्यूगु दु ।