येँ महानगरपालिकां फोहोर छेँ नं पिने मवांछेत स्वनिगःवासियात अपिल याःगु दु ।
महानगरपालिकाया ज्याकुथिं सोमबाः सार्वजनिक सुचं पिकाना स्वनिगःया फोहोर विसर्जन स्थलतक वनिगु लँ स्यनाच्वंगुलिं फोहोर छेँ नं पिने मपिकायेत इनाप याःगु दु ।
‘ल्याण्डफिल्ड साइटया सतक छुँ दिंनिसें मदिक्क वयाच्वंगु वां स्यंगुलिं फोहोर विसर्जन याये मफयाच्वंगुलिं छुं ईया नितिं फोहोर मवांछ्वेत अपिल याना,’ महानगरपालिकां पिकाःगु सुचंलय् च्वयातःगु दु ।
ल्याण्डफिल्ड साइट सञ्चालनय् वयेधुंका जक फोहोर ल्ह्वनेत नगरपालिका छेँछेँ वइ । नगरपालिकां फोहोर मल्ह्वनेवं येँया सतकय् फोहोर मुनेधुंकुगु दु । अझ ग्वन्हुलिपा फोहोर ल्ह्वनि धैगु नं निश्चित मदु ।
स्वनिगःया फोहोरमैलायात नुवाकोटया ककनी गाउँपालिका–२ स्थित सिस्डोलय् दुगु ल्याण्डफिल्ड साइटय् विसर्जन यानावयाच्वंगु दु । तर आः ल्याण्डफिल्ड साइट वनेगु लँपु स्यनाच्वंगु दु ।
फोहोर विसर्जन यायेगु मेगु विकल्प मदुगुलिं सिस्डलय् समस्या जुलकि येँ इलय् ब्यलय् दुर्गन्धित जुयाच्वंगु दु ।
0 Comments:
Post a Comment