स्वम्ह सञ्चारकःमिया सृजना, मायाको परिभाषा बोलया म्ये सार्वजनिक


विभेद अन्त्य यायेत मतिना हे मा । मतिनां जातभात, धर्म, सँस्कृति व तःमि चिमि म्हमस्यू । मतिनां जक समाजया विभेद अन्त्य सम्भव दु धैगु स्पष्ट हसना नापं नेपाली खस भाषाया ‘मायाको परिभाषा’ बोलया म्ये सार्वजनिक जूगु दु ।


संचारकःमि प्रज्वल शाक्य व बन्दना खड्कां मतिनाया परिभाषा मालादीगु दु । म्ये पाखें मतिनाया परिभाषा धयाबीत आग्र्रह याःगु दु । शुक्रबाः सनिल युट्युबय् सार्वजनिक जूगु थूगु म्येया सर्जक मेम्ह सञ्चारकःमि राजकुमार रायमाझी खः । रेडियो उपत्यकाया थुपिं स्वम्ह सञ्चारकःमिया प्रस्तुति थूगु म्ये येँया त्रिपुरेश्वरय् च्वंगु वल्र्ड ट्रेड सेन्टरया जास्मिन फिटनेस एण्ड स्पालय् छगु ज्याझ्वः ग्वसाग्वःसें सार्वजनिक याःगु खः ।


प्रतीश शाक्य, प्रयुक्ता केसी, बिगेन तुलाधर, सरला सिलवाल, किरोज स्थापित, सुशील बज्राचार्य, स्नेहा बज्राचार्य व अम्बिका राईया अभिनय थूगु म्येया म्यूजिक भिडियोलय् स्वय् दइ । 

तःमि मनुया म्ह्याय् व उगु हे छेँ ज्या याइम्हेसिया काय् दथुइ माया मतिना जूसा छु जुइ ? छेँ सिलकि छु जुइ ? समाजय् गुकथं भेदभाव न्यनाच्वंगु दु, सुश्म तवरं अन्याय गुकथं म्वानाच्वंगु दु, थूगु म्येया भिडियोलय् क्यनेत्यंगु दु । गीति बाखँ कथं न्ह्यब्वःगु थूगु म्येया भिडियोलय् येँ नापंया लागाया छायांकन यानातःगु दु ।


म्येय् लक्षुप्रकाश मल्लं संगीत एरेन्ज यानादीगु दु । गायक शाक्यया हे निर्देशन दूगु थूगु म्यूजिकल संकिपातय् सहनिर्देशन नापं नृत्य निर्देशन आराध्य लक्ष्मी खड्गीं यानादीगु दुसा छायाँकन व सम्पादन सोहन मानन्धरया खः ।

रेडियो उपत्यका ८७.६ मेगाहर्ज संचालन यानाच्वंगु युगवाणी मिडिया नेटवर्कया नायः पुष्पराज पराजुलीया सभापतित्वय् क्वचाःगु ज्याझ्वलय् नेपाल पत्रकार महासंघया नायः विपुल पोखरेल मू पाहाँ कथं झाःगु खः । ज्याझ्वलय् विशेष पाहाँ कथं पूर्व स्वास्थ्य राज्य मन्त्री तिर्थ राम डंगोल झायादीगु खःसा पाहाँ कथं वरिष्ठ संकिपा पत्रकार विजयरत्न तुलाधर असंबरे झायादीगु खः ।

अथेहे नेटवर्कया कार्यकारी सल्लाहकार कृष्ण के सि, कार्यकारी निर्देशक सुरेश आचार्य पाहाँ कथं झायादीगु खः ।

प्रमुख अतिथि पोखरेलं म्येय् जातिय विभेदया अन्त्य मतिना हे जूगु निष्कर्श पिकायेत स्वःगु न्ह्यथनादिल ।




Share on Google Plus

News: Newa News

    छ्याता
    फेसबुक छ्याता