इंग्ल्याण्डयात पेनाल्टी सुटआउटय् बुका इटलीं त्याकल युरोकप उपाधि


इंग्ल्याण्डयात पेनाल्टी सुटआउटय् बुका इटलीं युरोकप २०२० या उपाधि त्याःगु दु । सोमबाः सुथः जूगु फाइनलय् इटलीं इंग्ल्याण्डयात पेनाल्टी सुटआउटय् ३-२ गाेलं बुकुगु खः ।

सुटआउटय् इटलीया गोलकिपर जियानलुजी डोनारुम्बा नायक जुया निगु पेनाल्टी बचेयाःगु खः । इंग्ल्याण्डया गोलकिपर जोर्डन पिकफोर्डं नं निगु पेनाल्टी हे बचेयाःगु खः ।

लण्डनया वेम्वली स्टेडियमय् जूगु कासाया निर्धारित व अतिरिक्त इलय् १-१ या बराबरीइ क्वचाःसेंलि कासा पेनाल्टी सुटआउटय् वंगु खः । कासाया निगुगु मिनेटय् हे इंगल्याण्डं अग्रता काःगु खः । लुक श नं किरन ट्रिपिएरया पासय् गोल याःसें  इंग्ल्याण्डयात अग्रता ब्यूगु खः । 


न्हापांगु हाफय् इंग्ल्याण्डं अग्रता तयातल । तर निगुगु हाफय् इटलीं बराबरी गोल कयेकल । ६७क्वःगु मिनेटय् लियोनार्दो बोनुचीं मार्को भेराट्टीया पासय् इटलीया नितिं बराबरी गोल याःगु खः ।


निर्धारित ९० मिनेटया कासा १-१ या बराबरी जुइधु‌का ३० मिनेटया अतिरिक्त इ म्हितुगु खःसा उकि नं गाेल मजूसेंलि पेनाल्टी सुटआउट जूगु खः ।

सुटआउटय् इटलीया डोमेनिको बेरार्डी, लियोनार्दो बोनुची व फेडेरिको बर्नाडेसीं गोल याःगु खः । इटलीका आन्द्रे बेलोट्टी व जर्जिन्होया पेनाल्टी इंग्लिस गोलकिपर पिकफोर्डं बचेयाःगु खः ।

इंग्ल्याण्डया ह्यारी केन व ह्यारी मग्वायरं जक गोल यायेफत । जाडोन सान्चो व बुकायो शाकाया पेनाल्टी इटलीया गोलकिपर डोनारुम्बां बचेयातसा मार्कुस रासफोर्डया बल पोष्टय् लाना पिहाँवन ।

५२ दँलिपा न्हापांगु खुसि युरोकप त्याःगु इटलीं १५ दँ लिपा तःधंगु धेंधेंबल्लाया उपाधि त्याःगु खः । सन २००६ लय् इटलीं विश्वकप उपाधि त्याःगु खः । सन् १९६८ इ युरोकप त्याःगु इटलीं २००० व २०१२ य् युरो फाइनल म्हितुगु खःसा उकि ल्यू जूगु खः ।

उखे ५५ दँलिपा तःधंगु धेंधेंबल्लाया फाइनल थ्यंगु इंग्ल्याण्डं न्हापांगु खुसि  युरोकप फाइनल म्हितुगु खः । 








Share on Google Plus

News: Newa News

    छ्याता
    फेसबुक छ्याता