अर्जेन्टिनां जारी कोपा अमेरिका फुटबलय् कोलम्बियायात बुका फाइनलय् थःगु थाय् काःगु दु । अर्जेन्टिनां ४-३ गोल अन्तरं कोलम्बियायात बुकुगु खः । निर्धारित ९० मिनेटया कासाय् १-१या बराबरी जूगु खःसा कासा पेनाल्ती सुटआउटय् वंगु खः । उकि अर्जेन्टिना ३-२ नं त्याःगु खः । कासाया ७ मिनेटय् हे लौटारो मार्टिनेजया गोलं अर्जेन्टिनां अग्रता काःगु खः । लिपा लुइस डियाजं ६१ मिनेटय् गोल याःसें कासायात बराबरी याःगु खः । ९० मिनेटया कासाय् मेगु गोल मजूगुलिं कासा तप्यंक पेनाल्ती सुटआउटय् वंगु खः ।
पेनाल्ती सुटआउटय् धाःसा अर्जेन्टिनी गोलकिपर इमिलियानो मार्टिनेजं उत्कृष्ठ बचाउ यानादिल । कोलम्बियाया न्यागु पेनाल्तीइ स्वंगु वयेकलं बचेयानादिल ।
अर्जेन्टिनाया लियोनल मेसि, लियान्ड्रो पारेडेस व लौतारो मार्तिनेजं पेनाल्ती सुटआउटय् गोल याःगु खःसा रोड्रिगो डि पाउलं बल पोष्टं च्वय् कयेकादिल । उखे कोलम्बियाया जुवान क्वाड्राडो व मिगुएल बोर्जां जक पेनाल्ती गोल केकेफूगु खःसा डेभिन्सोन सान्चेज, यरी मिना व एडविन कार्डानोया पेनाल्ती धाःसा अर्जेन्तिनाया गोलकिपरं पंगु खः ।
आः अर्जेन्टिनां ब्राजिल नाप फाइनलय् म्हितिगु जुइ । फाइनल १० जुलाइ शनिबाः जुइ ।
0 Comments:
Post a Comment