एमाले मुँज्याय् शिक्षा मन्त्री कृष्णगोपाल श्रेष्ठया राजीनामा माग, प्रधानमन्त्रीपाखें बचाउ


नेकपा एमालेया अध्यक्ष केपी शर्मा ओली पुचःया नेतातयेसं शिक्षा मन्त्री कृष्णगोपाल श्रेष्ठया राजीनामा फ्वंगु दु ।

बालुवाटारय् जूगु झिक्वःगु राष्ट्रिय महाधिवेशन आयोजक कमिटीया मुँज्याय् पूर्वमन्त्री जगतबहादुर विश्वकर्मां मन्त्री श्रेष्ठं रूपा सुनार प्रकरणय् गल्ती याःगुलिं आत्मआलोचना यायेमाःगु न्ह्यथनादिल ।

रूपा सुनारया मुद्दाय् एमालेया वरिष्ठ केन्द्रीय दुजलं गूगु व्यवहार क्यनादिल व दुःखद व खेदजनक जूगु विश्वकर्मां न्ह्यथनादिल । थुकिं जातीय विभेदविरूद्ध सकल नागरिकयात आहात या:गु वयेकलं मुँज्याय् न्ह्यथनादिल । थज्यागु खँ एमालेप्रतिया आशा–विश्वास नं बुलुके फैगु जूगुलिं आत्मआलोचना यायेमाःगु वयेकःया तर्क दु । श्रेष्ठ आः नं मन्त्री जूगुलिं थथें राजीनामा बीमाःगु थःगु छ्याता तयादिल ।

मन्त्री जुया वयेकलं दक्वसिया अभिभावक जुइ मफुत । व्यक्तिगत रूपं थःगु आत्मीय सम्बन्ध दुसां उच्च नैतिकता प्रदर्शन याना राजीनामा बीत छ्याता बियागु विश्वकर्मां न्ह्यथनादिल ।

लिसलय् प्रधानमन्त्री ओलीं मन्त्री श्रेष्ठया व्यवहार शोभनीय मजूगु न्ह्यथनादिल ।

श्रेष्ठं थः भावनाय् वना कमजोरी जूगु स्वीकार याःगु व भविष्यय् थथे मयायेगु न्ह्यथंगु प्रधानमन्त्री ओलीं मुँज्याय् न्ह्यथनादिल । उगु विषयलय् शिक्षा मन्त्री श्रेष्ठं धाःसा छुँ प्रतिक्रिया बियामदी । 

मुँज्याय् ब्वति काम्ह नेता बमबहादुर विश्वकर्मां नं मन्त्री श्रेष्ठं राजीनामा बीमाःगु न्ह्यथादिल ।

थरया आधारय् रूपा सुनारयात बालं मब्यूगु द्वपनय् बबरमहलया सरस्वती प्रधानयात त्वतकेत प्रहरी चौकीइ हे वना झण्डावाल गाडीइ छेँ तक त्वःतुगुलिं मन्त्रीया आलोचना जुयावयाच्वंगु दु । सतकय् वयेकःया राजिनामा फ्वँसें प्रदर्शन जुयाच्वंगु दु । थौं हे वयेकलं मानव अधिकार आयोगय् वना माफि फ्वनादीगु खः ।


Share on Google Plus

News: Newa News

    छ्याता
    फेसबुक छ्याता