खोप ऐन हाचां गाया नेपालय् थौं निसें कोरोना खोप, समस्या वःसा थः हे जिम्मेवार


नेपालय् कोरोना भाइरसविरुद्धया खोप अभियान थौं सुथः १० बजे न्ह्यायेत्यंगु दु । प्रधानमन्त्री केपी शर्मा ओलीं बालुवाटारं भर्चुअल रुपं येँया ११ गु अस्पतालय् थ्व अभियान न्ह्याकेत्यंगु दु ।

शुक्रराज ट्रपिकल तथा सरुवा रोग अस्पताल, वीर अस्पताल, आयुर्वेद अनुसन्धान तथा तालिम केन्द्र अस्पताल, कीर्तिपुर, पाटन अस्पताल, परोपकार प्रसूति तथा स्त्री रोग अस्पताल, त्रिवि शिक्षण अस्पताल, भक्तपुर अस्पताल, शहीद धर्मभक्त अंग प्रत्यारोपण केन्द्र, काठमाडौं मेडिकल कलेज, जोरपाटी, सशस्त्र प्रहरी अस्पताल, बलम्बु, शहीद गंगालाल अस्पतालया स्वास्थ्यकर्मीं छक्वलं खोप तयेत्यंगु दु ।

शुक्रराज टेकु अस्पतालया निर्देशक डा. सागर राजभण्डारीं टेकु अस्पतालया न्हापांगु खोप कायेगु घोषणा यानादीगु दु । अथेहे निगुगु नम्बरय् डा. अनुप बास्तोलां खोप तयादीत्यंगु दु ।

स्वास्थ्य सेवा विभागया कथं न्हापांगु चरणय् कोरोना भाइरस रोकथामया अग्रपंक्तिइ दुपिं ४ लख ३० द्व म्हेसित खोप तयेत्यंगु दु । ७ प्रदेश व स्वनिगः याना ६२ गु अस्पताल व ७७ जिल्लाया ३०० स्वयाँ अप्व केन्द्रं खोप अभियान न्ह्यायेत्यंगु दु ।

छगु खोप बुथं छन्हुं १२० निसें १२५ म्हेसित खोप बीगु स्वास्थ्य मन्त्रालयया प्रवक्ता डा. जागेश्वर गौतमं न्ह्यथनादिल ।


खोपया जिम्मेवारी थः हे


स्वास्थ्य व जनसंख्या मन्त्रालयया कथं कोभिड १९ विरुद्धया खोप तयेधुंका गम्भीर स्वास्थ्य समस्या वःसा, अंगभंग जूसा वा मृत्यु जूसा खोप ब्यूगु निकाय वा संस्थां क्षतिपूर्ति बी मखु । कोरोना विरुद्धया खोप न्हूगु व आपतकालीन जूगुलिं कम्पनीं क्षतिपूर्ति मबीगु स्वास्थ्य मन्त्रालयया प्रवक्ता डा. गौतमं न्ह्यथनादिल ।

क्षतिपूर्ति मागदाबी याःसा भ्याक्सिन बी मफइगु भ्याक्सिन उत्पादक कम्पनीया निर्णय जूगुलिं सरकारं खोपया कारणं छुं अवाञ्छित घटना जूसा खोप उत्पादक कम्पनी, आयातकर्ता व वितरकयात क्षतिपूर्ति मबीकेगु निर्णय जूगु परिवार कल्याण महाशाखाया प्रमुख डा तारानाथ पोखरेलं न्ह्यथनादिल । खोप बी धुंका गम्भीर असर खनेदःसा क्षतिपूर्ति मागदाबी यायेमखु धका नेपाल सरकारं निर्णय याना खोप उत्पादक कम्पनीयात लिखित प्रतिबद्धता पौ छ्वःगु खः । सरकारं थूगु पौ छ्वयेधुंका जक नेपालय् खोप वःगु खः ।

खोप ऐनया २०७२ या दफा २८ य् उपचार व क्षतिपूर्तिसम्बन्धी व्यवस्था यानातःगु दु । गुकि खोपं गम्भीर असर याःसा क्षतिपूर्तिया व्यवस्था यायेमाःगु च्वयातःगु दु । तर थ्व ऐन हाचां गाया खोप कया अंगभंग जूसा वा मृत्यु जुया खोप ऐनया आधारय् क्षतिपूर्ति माग मयायेमा धका सरकारं खोप कार्डय् मञ्जुरीनामाया व्यवस्था याःगु दु । नेपाल सरकारं कोभिड १९ विरुद्ध उपलब्ध याःगु खोप जिं राजीखुशी कयागु दु व लिपा छुं भवितव्य जुया छुं जूसा सुयातं दोष मबीसे स्वयं जिम्मेवार जुइ धका मञ्जुरीनामाय् च्वयातःगु दु ।


Share on Google Plus

News: Newa News

    छ्याता
    फेसबुक छ्याता